Vauxhall Cross

Vauxhall Cross yw pencadlys Gwasanaethau Cudd Prydain (British Secret Intelligence Service, neu MI6). Saif ar lannau’r Tafwys yn Llundain, ac agorwyd yng Ngorffennaf 1994. Adeiladwyd gan Terry Farrel, a dylanwadwyd arno gan adeiladau fel y Battersea Power Station a themlau’r Maya a’r Aztec. Oherwydd bod cynifer o haenau gwahanol i’r adeilad, mae ganddo 60 to! Mae yna 25 gwahanol fath o wydr ar yr adeilad, a gwydriad triphlyg yn y ffenestri, am resymau diogelwch. Mae 5 o’r lloriau islaw lefel y dŵr, ac mae’r adeilad hefyd wedi ei amddiffyn gan ddwy ffos llawn dŵr. Gwelir Vauxhall Cross yn nifer o ffilmiau diweddar James Bond. Dangoswyd The World is Not Enough i staff MI6 yn yr adeilad, a chymeradwyon nhw pan gafodd eu pencadlys ei chwythu lan yn y ffilm.