Carwyn Tywyn
Mae Carwyn Tywyn (ganwyd 1975) yn delynor, cyfansoddwr a pherfformiwr. Ei enw bedydd yw Carwyn Fowler.
| Carwyn Tywyn | |
|---|---|
| Ganwyd | 1975  |
| Dinasyddiaeth |  Cymru |
| Galwedigaeth | telynor |
Bywyd cynnar ac addysg golygu
Ganwyd Carwyn yng Nghaerlŷr ac fe'i magwyd yn y Borth, Ceredigion gan fynychu Ysgol Gyfun Gymunedol Penweddig yn Aberystwyth. Graddiodd gyda doethuriaeth mewn Gwleidyddiaeth yn 2004 o Brifysgol Caeredin.
Gyrfa golygu
Bu'n academydd am ddwy flynedd cyn symud i'r Cynulliad Cenedlaethol fel Gohebydd Gwleidyddol i'r cylchgrawn Golwg.
Ers 2007, mae wedi treulio'r rhan fwyaf o'i gyrfa yn y sector gwirfoddol yng Nghymru, weithio'n cyfuno swydd ffurfiol gyda'i waith ar y delyn.
Mae'n gweithio fel Swyddog Achos Rhanbarthol dros Mencap Cymru yng Nghanolbarth a Gorllewin Cymru [1]
Cerddoriaeth golygu
Mae'n hoffi cerddoriaeth o bob math gan gynnwys canu gwerin, canu gwlad a bluegrass, clasurol a cherddoriaeth pop yr 1980au.
Dechreuodd Carwyn ganu alawon traddodiadol ar y delyn gwerin yn 1991. Cofrestrodd yn hunan-gyflogedig yn ffurfiol rhwng 1997-2003; 2005; 2010-11 a 2015-16. Yn y cyfnod cyntaf o hunan-gyflogaeth, ariannodd ei radd doethuriaeth trwy fynd allan i fysgio trwy ddeheudir Cymru a threfi agos yn Lloegr.
Mae wedi teithio'n helaeth ar draws Cymru a thu hwnt fel telynor. Mae wedi recordio 3 CD ac wedi cydweithio gyda nifer o artistiaid eraill. Mae wedi ennill yn yr Eisteddfod Genedlaethol, ac yn 2013 cafodd ei gynnwys yn llyfr Bruce Cardwell, The Harp in Wales[2].
Yn 2016, cafodd ddwy o'i alawon gwreiddiol ("Tyndyrn" ac "Afon Gwy") eu mabwysiadu ym mherfformiadau personol Robin Huw Bowen.
Cyngherddau Nodweddiadol golygu
Mae wedi perfformio yng Ngŵyl Werin y Cnapan (Ffostrasol), Gŵyliau’r Gwyniad a Ffidlan! (Y Bala), Lowender Perran (Cernyw), Eisteddfod Ryngwladol Llangollen, y Gyngres Geltaidd (Inverness yn yr Alban ac An Oriant yn Llydaw), Gŵyl Abergwaun, Gŵyl Nôl a ‘Mlaen (Llangrannog), Cwpwrdd Nansi (Caerdydd) a Britfest (Hambwrg). Yn 2009, canodd y delyn yn y Cynulliad Cenedlaethol ar achlysur ymddeoliad Rhodri Morgan fel Prif Weinidog Cymru. Yn 2012 bu ar daith unigol o amgylch Ynysoedd Shetland.
Gwobr golygu
Yn 2013 enillodd Wobr Goffa John Weston Thomas ar gyfer y delyn gwerin yn Eisteddfod Genedlaethol Cymru, yn Ninbych.
Cydweithio Cerddorol golygu
Roedd Carwyn yn artist gwâdd ar CD Fflur Dafydd (CD Gwreiddiau 2012), SKEP (CD "CTRL-S" 2004) Ysbryd Chouchen (CD La La 1997), Ffynnon, a Dawnswyr Nantgarw.
Bu'n artist cefnogol ar ddechrau perfformiadau gan Dafydd Iwan, Yr Hwntws, Fflur Dafydd, Gareth Bonello, Gildas, Aros Mae a Dylan Fowler. Mae hefyd wedi canu mewn deuawd gyda Cormac de Barra ar un achlysur. Mae hefyd yn aelod o grwp "Sesiwn Caerdydd" ar gyfer y cystadleuaeth grwp offerynnol yn yr Eisteddfod Genedlaethol.
Bywyd personol golygu
Mae'n byw ym Mhorth Tywyn ar arfordir, Sir Gaerfyrddin. Mae'n briod â Kathryn ac yn dad i ddau plentyn, sef Heledd a Gwyn.
Mae'n gefnogwr brwd o AFC Wimbledon.
O ganlyniad i rhai o dreialon bywyd, dywed Carwyn ar ei wefan ei fod wedi magu diddordeb mewn iechyd meddwl ac adferiad. Ym Mis Mawrth, 2015, rhoddodd gorau i yfed alcohol, am resymau personol. Ers hynny, mae wedi bod yn aelod brwdfrydig o fudiad Club Soda ac yn ymddiriedolwr o Stafell Fyw Caerdydd. Mae wedi ei ddylanwadu gan y syniad o adferiad fel mater o gyfiawnder cymdeithasol: bod modd trawsnewid trealon a chamgymeriadau unigol mewn i budd cymdeithasol.
Disgyddiaeth golygu
- Carwyn Tywyn - Awen ac Aber (Yn fyw yn Aberystwyth / Live at Aberystwyth)
- Alawon o'r Stryd
- Tanddwr
Cyfeiriadau golygu
- ↑ http://carwyntywyn.blogspot.co.uk/2013/09/cyfllwyniad-introduction.html
- ↑ "copi archif". Archifwyd o'r gwreiddiol ar 2020-08-04. Cyrchwyd 2018-04-05.