Bailey Davies

Cefnwr rygbi'r undeb o Gymru oedd David Bailey "Beili" Davies (3 Rhagfyr 1884 - 24 Awst 1968). Chwaraeodd rygbi clwb dros Brifysgol Rhydychen, Llanelli a Chymru Llundain a rygbi rhyngwladol dros Gymru.

Bailey Davies
Ganwyd	3 Rhagfyr 1884  Llanwenog
Bu farw	24 Awst 1968  Hendon
Dinasyddiaeth	Cymru
Alma mater	Coleg yr Iesu, Rhydychen Prifysgol Cymru, Llanbedr Pont Steffan
Galwedigaeth	chwaraewr rygbi'r undeb
Chwaraeon
Tîm/au	Tîm rygbi'r undeb cenedlaethol Cymru, Clwb Rygbi Cymry Llundain, Clwb Rygbi Llanelli
Safle	Cefnwr
Gwlad chwaraeon	Cymru

Cefndir

Ganwyd Davies yn Llanwenog, Sir Gaerfyrddin yn ail fab Mr Thomas Davies, o Fferm Baileycoch, ger Llanbedr Pont Steffan. Addysgwyd ef yn Ysgol Ramadeg Dewi Sant, Llanbedr Pont Steffan, a Choleg Dewi Sant, Llanbedr Pont Steffan. O Lanbedr fe aeth i Goleg yr Iesu, Rhydychen lle bu'n astudio mathemateg cyn graddio ym 1908. Chwaraeodd yn safle'r cefnwr yn nhîm rygbi'r brifysgol ym 1905, 1906 a 1907 a chafodd ei gapio dros Gymru yn erbyn Lloegr ym 1907. Bu ei frawd Austin Davies hefyd yn chware rygbi dros Lanelli

Gyrfa

Ar ôl gadael y Brifysgol ym 1908, cafodd ei dderbyn fel meistr cynorthwyol yng Ngholeg Llanymddyfri. Y flwyddyn ganlynol symudodd i Loegr, gan ddod yn feistr cynorthwyol yn Ysgol Merchant Taylors, Llundain, lle bu'n bennaeth ar y Corfflu Hyfforddi Swyddogion ac yn gweithredu fel hyfforddwr Rygbi'r Ysgol.

Cyn dechrau'r Rhyfel Byd Cyntaf, penodwyd Davies yn 2il Is gapten yn y Corfflu Hyfforddi Swyddogion. Ym 1917 gwirfoddolodd am wasanaeth gweithredol a chafodd ei bostio i 13eg Catrawd Llundain. Gwasanaethodd yn Ffrainc ac ym 1918 dyfarnwyd y Groes Filwrol iddo am ddewrder wedi iddo achub milwyr clwyfedig yn ystod patrôl nos chipio 27 o Almaenwyr a dau wn peiriant.

Ar ddiwedd y Rhyfel dychwelodd Davies i Merchant Taylors gan barhau i arwain y Corfflu Hyfforddi Swyddogion. Ym1926 cafodd ei ordeinio yn offeiriad Eglwys Loegr ond parhaodd yn ei swydd fel athro. Pan symudodd yr Ysgol Merchant Taylors o Lundain i Northwood ym 1933 penodwyd Davies yn feistri un o dai preswyl yr Ysgol. Yn ystod yr Ail Ryfel Byd bu'n rhedeg uned Gwarchodlu Cartref yr ysgol. Ym 1946 gadawodd Merchant Taylors a aeth yn Rheithor yn Sutton ac Eyeworth, Swydd Bedford, gan barhau yn y swydd hyd 1957. Roedd ei adloniant ar ôl ymddeol yn cynnwys golff a hyfforddi'r tîm rygbi lleol, gan weithredu fel dyfarnwr mewn sawl gêm.

Ymddeolodd i Seer Green yn Swydd Buckingham ac yn ddiweddarach i Hendon,

Gyrfa rygbi

Brifysgol Rhydychen, gan ennill tri Chrys Glas chwaraeon ym 1905, 1906 a 1907 bu'n rhan o'r tîm rhyng golegol a gurodd Caergrawnt ym 1907. Chwaraeodd yn erbyn y Crysau Duon yn ystod eu taith ym 1905 a chafodd ei gapio i Gymru fel cefnwr pan guron nhw Loegr ar 12 Ionawr, yng ngêm agoriadol Pencampwriaeth y Pedair Gwlad 1907 .

Gemau rhyngwladol

Cymru

• Lloegr 1907,

Teulu

Ym 1914 priododd Davies â Elsie Mary (née Pullinger) merch William Henry Russell Pullinger YH , bu iddynt pedair merch

Marwolaeth

Bu farw yn Hendon yn 83 mlwydd oed amlosgwyd ei weddillion a gwasgarwyd ei ludw ym mynwent ei gyn eglwys yn Sutton. Gosodwyd llechen goffa yn yr eglwys ym 1978, er cof am Davies a’i wraig

Llyfryddiaeth

• Jenkins, John M.; et al. (1991). Who's Who of Welsh International Rugby Players. Wrexham: Bridge Books. ISBN 1-872424-10-4.
• Smith, David; Williams, Gareth (1980). Fields of Praise: The Official History of The Welsh Rugby Union. Caerdydd: Gwasg Prifysgol Cymru. ISBN 0-7083-0766-3.