Baner Rwanda

Mae gan faner genedlaethol Rwanda dri stribed llorweddol, yr uwch yn las golau ac yn lled hanner y faner, y canol yn felyn ac yn lled chwarter y faner, a'r chwarter gwaelod yn wyrdd. Lleolir haul euraidd gyda 24 o belydrau yn fly y stribed glas i symboleiddio goleuedigaeth ac undod yn erbyn anwybodaeth. Mae diamedr yr haul yn 0.125 o led y faner. Mae glas yn symboleiddio hapusrwydd ac heddwch, mae melyn yn cynrychioli datblygiad economaidd a chyfoeth mwynol y wlad, ac mae gwyrdd yn symboleiddio gobaith am ffyniant ar sail adnoddau naturiol Rwanda. 2:3 yw cymhareb y faner hon.

Baner Rwanda

Mabwysiadwyd y faner bresennol ar 31 Rhagfyr 2001, ynghyd ag arfbais ac anthem genedlaethol newydd, i ddisodli'r hen symbolau cenedlaethol a ystyriwyd yn atgof o'r ymwahaniaeth ethnig a arweiniodd at hil-laddiad Rwanda ym 1994. Cafwyd gwared ar goch a du o'r faner, lliwiau sydd ganddynt gysylltiadau â gwaed a galar. Gobaith y llywodraeth yw i'r symbolau cenedlaethol newydd cynrychioli undod cenedlaethol a dyfodol llewyrchus i'r wlad. Dewisiwyd y faner a'r anthem newydd gan gystadleuaeth genedlaethol, ac enillodd yr arlunydd a pheiriannydd Alphonse Kirimobenecyo gyda'r dyluniad presennol.

Cyn-faneri

• 
  1961–2001

Enillodd Rwanda ei hannibyniaeth ar 1 Gorffennaf 1962, ond mae baner 1961–2001 yn dyddio o'r cyfnod pan oedd y wlad yn rhan o Rwanda-Wrwndi.

O 1961 hyd 2001 roedd gan Rwanda faner drilliw fertigol o'r lliwiau pan-Affricanaidd, coch, melyn a gwyrdd. Roedd lliwiau a dyluniad y faner hon yn unfath â baner Guinée, ac eithrio llythyren "R" ddu yn y stribed melyn i olygu "Rwanda".

Dolenni allanol

Comin Wikimedia

Mae gan Gomin Wikimedia
gyfryngau sy'n berthnasol i:

faneri Rwanda

• (Saesneg) National Symbols Archifwyd 2013-06-19 yn y Peiriant Wayback (Llywodraeth Rwanda)
• (Saesneg) Rwanda (Flags of the World)