Ffair Fêl Conwy
Ffair hynafol a gynhelir i werthu mêl yw Ffair Fêl Conwy. Fe gynhelir yn flynyddol ar y 15fed o Fedi yn nhref Conwy yn Sir Conwy, gogledd Cymru, a hynny ers dros 700 mlynedd.[1]
| Math | Ffair  |
|---|
Hanes
golygu.jpg)
Sefydlwyd y ffair fêl dan siarter Bwrdeisdref Aberconwy ar ddiwedd y 13g, yn nheyrnasiad Edward I o Loegr, er mwyn galluogi Cymry lleol i werthu mêl yn y dref gaerog honno a hynny ar adeg pan oedd yn fwrdeistref Seisnig. Cofnodir anfon "pibell o fêl" o Aberconwy i Gastell Rhuddlan; cost y cludiant oedd 1 swllt 4 ceiniog.[1]
Cymreigwyd y dref - a'r ffair - gyda'r blynyddoedd. Yn 1835 cofnodwyd bod llewyrch ar y Ffair Fêl ac yn 1911 cofnowyd ei bod yn un o ddeg ffair flynyddol a gynhelid yng Nghonwy; o'r deg hynny dim ond y Ffair Fêl a Ffair Hadau Conwy sy'n dal i fynd heddiw.[1]
Bu bron iawn i'r ffair ddarfod yn 1983 yn dilyn cyfres o hafau gwael i wenynwyr lleol ond cymerodd Cyngor Tref Conwy yr awenau ac achubwyd y ffair.[1] Ers 1990 trefnir y ffair gan Gymdeithas Gwenynwyr Conwy gyda'r elw yn mynd at yr elusen Gymreig Bees for Development.[2] Ceir stondinau crefft a chynnyrch lleol arall yn ogystal â stondinau mêl.
Gweler hefyd
golyguCyfeiriadau
golygu- ↑ 1.0 1.1 1.2 1.3 'Conwy Honey Fair' Archifwyd 2014-12-25 yn y Peiriant Wayback, Peter McFadden.
- ↑ gwefan Cymdeithas Gwenynwyr Conwy. Adalwyd 13.01.2015.
Dolenni allanol
golygu- Gwefan Cymdeithas Gwenynwyr Conwy (dwyieithog)
- 'Conwy Honey Fair' Archifwyd 2014-12-25 yn y Peiriant Wayback, erthygl ymchwil gan Peter McFadden; National Fairground Archive, Prifysgol Sheffield. (Saesneg)
- 'The Conwy Honey Fair', erthygl ar wefan Bee Craft. (Saesneg)