Gwersyll yr Urdd Pentre Ifan

Gwersyll yr Urdd Pentre Ifan
Math	cyrchfan
Sefydlwyd	2023 ;
Daearyddiaeth
Lleoliad	Felindre Farchog
Gwlad	Cymru
	[golygwch ar Wicidata]

Canolfan breswyl aml weithgaredd yw Gwersyll yr Urdd Pentre Ifan. Lleolir y gwersyll ym mhentref Pentre Ifan ger Felindre Farchog yn Sir Benfro a'i hagor yn swyddogol ym mis Medi 2023.^[1] Dyma pedwerydd Gwersyll yr Urdd, ynghyd â gwersylloedd adnabyddus Llangrannog, Glan-llyn a Bae Caerdydd. Mae'r safle o fewn pymtheg milltir i Wersyll yr Urdd Llangrannog.

Enwir y gwersyll ar ôl cromlech Pentre Ifan ger llaw.

Nod

Nod y gwersyll yw blaenoriaethu'r amgylchedd, lles emosiynol pobl ifanc a'r Gymraeg.

Galwa'r Urdd y safle yn Wersyll Amgylchedd a Lles. Credir mai dyma'r cyntaf o'i fath yng Nghymru, gyda'r profiad yn addo i fod yn "ddihangfa rhag y byd digidol" i wersyllwyr. Prif bwyslais y ganolfan ger Felindre Farchog yw cynnig addysg amgylcheddol i blant a phobl ifanc.^[1]

Mae'r safle hefyd ar gael ar gyfer llogi i gynnal priodasau.^[2]

Sefydlu

Agorwyd canolfan Pentre Ifan yn wreiddiol yn 1992 a hynny fel canolfan addysgol. Derbyniodd yr Urdd gyllid trwy gymorth rhaglen Cymunedau Dysgu Cynaliadwy Llywodraeth Cymru, Sefydliad Garfield Weston a Sefydliad Elusennol Tywysog Cymru, i droi Canolfan Pentre Ifan i fod yn wersyll.^[1]

Y Safle

Rhennid y Gwersyll yn bum adeilad:

Cwt Carningli - llety newydd y safle sydd yn cynnwys 5 ystafell ensuite. Mae un o'r ystafelloedd hyn yn cynnwys cyfleusterau anabl ac mae lle i hyd at 32 o bobl, neu 37 o defnyddio'r gwlâu dwbl ar gyfer dau berson.
Y Porthdy - adeilad hynaf y safle a oedd arfer bod yn borthdy yng nghyfnod y Tuduriaid- mae hi wedi bod yno ers 1485. Mae dwy ystafell gwely ar gael yn yr adeilad yma gyda chyfleusterau ymolchi gerllaw ac yn cysgu hyd at 12.
Neuadd y Porthdy - neuadd i hyd at 50 i fwyta, ymlacio a chymryd rhan mewn rhai o weithdai a gweithgareddau'r gwersyll.
Y Berllan - pabell saffari yn ardal glampio'r berllan gan golygfa o Garnedd Meibion Owen o'r feranda. Mae tair pabell ar gael, dwy gyda lle i 10 o bobl yr un ac un babell gyda lle i hyd at 6 gyda chyfleusterau ymolchi ac ardal goginio gyfagos. Mae lle i hyd at 26 o bobl.
Cegin Allanol Cymdeithasol - tu allan i Gwt Carningli mae ardal gysgodol lle mae gegin awyr agored ar gael i’w ddefnyddio sy'n cynnwys popty pitsa, crochan, barbeciw a sinc, gardd perlysiau a lle i fwyta a chymdeithasu.
Llecynnau Lles - o gylch y safle ceir ardaloedd cysgodol naturiol lle gall ymwelwyr ddianc am sgwrs, cyfnod o fyfyrio neu ymlacio a mwynhau’r tawelwch.^[3]

Nofel antur

Yn 2012 cyhoeddwyd nofel ar gyfer plant a'r arddegau gan Gareth Lloyd James o'r enw Dirgelwch Pentre Ifan a gyhoeddwyd gan Wasg Gomer. Mae'n dilyn anturiaethau pedwar bachgen ifanc yn y gwersyll. Mae'n rhan o gyfres o nofelau eraill wedi eu lleoli yng ngwersylloedd yr Urdd.^[4]

Gweler hefyd

Dolenni allanol

Manylion y gwersyll ar wefan yr Urdd
@PentreIfan tudalen Facebook y Gwesyll
Gwersyll yr Urdd Pentre Ifan fideo hyrwyddo ar sianel Youtube yr Urdd (2024)

Cyfeiriadau

↑ ^1.0 ^1.1 ^1.2 "Urdd: Agor gwersyll newydd ym Mhentre Ifan, Sir Benfro". BBC Cymru Fyw. 28 Medi 2023.
↑ "Priodi ym Mhentr Ifan". Gwefan yr Urdd. Cyrchwyd 9 Medi 2024.
↑ "Llety a Chyfleusterau". Gwefan yr Urdd. Cyrchwyd 9 Medi 2024.
↑ "Cyfres Cawdel: Dirgelwch Pentre Ifan". Gwales.Com. Cyrchwyd 9 Medi 2024.

Eginyn erthygl sydd uchod am Sir Benfro. Gallwch helpu Wicipedia drwy ychwanegu ato

[BBC-1] 1.0 ^1.1 ^1.2 "Urdd: Agor gwersyll newydd ym Mhentre Ifan, Sir Benfro". BBC Cymru Fyw. 28 Medi 2023.

[2] "Priodi ym Mhentr Ifan". Gwefan yr Urdd. Cyrchwyd 9 Medi 2024.

[3] "Llety a Chyfleusterau". Gwefan yr Urdd. Cyrchwyd 9 Medi 2024.

[4] "Cyfres Cawdel: Dirgelwch Pentre Ifan". Gwales.Com. Cyrchwyd 9 Medi 2024.

[1]

[2]

[3]

[4]