Léon Walras

Economegydd Ffrengig a oedd yn un o brif ffigurau Ysgol Lausanne oedd Marie-Esprit-Léon Walras (16 Rhagfyr 1834 – 5 Ionawr 1910) sydd yn nodedig am fformiwleiddio damcaniaeth gwerth ymylol ac am arloesi damcaniaeth cydbwysedd cyffredinol. Ei gampwaith ydy Éléments d’économie politique pure (1874–77).

Léon Walras
Ganwyd	Léon Walras  16 Rhagfyr 1834  Évreux
Bu farw	5 Ionawr 1910  Clarens
Dinasyddiaeth	Ffrainc
Alma mater	École nationale supérieure des mines de Paris
Galwedigaeth	economegydd, athro cadeiriol, mathemategydd
Cyflogwr	Prifysgol Lausanne
Mudiad	Ysgol Lausanne
Tad	Auguste Walras

Ganed yn Évreux yn ardal Normandi, Teyrnas y Ffrancod, yng nghyfnod brenhiniaeth Gorffennaf, yn fab i'r economegydd Auguste Walras. Methodd yr arholiad mynediad i'r École Polytechnique ym Mharis ddwywaith, am iddo beidio adolygu ei fathemateg, ac aeth i astudio yn yr École des Mines yn 1854. Gadawodd yr ysgol ar ôl blwyddyn yn unig, a throdd ei sylw at lenyddiaeth am gyfnod. Yn 1858, cafodd ei berswadio gan ei dad i astudio economeg.

Oherwydd diffyg ei addysg ffurfiol, ni fedrai Walras ennill swydd yn y brifysgol. Treuliodd ychydig flynyddoedd yn newyddiadura ac yn gweithio i sawl busnes aflwyddiannus cyn iddo sefydlu banc gyda Léon Say yn 1865 ar gyfer cydweithfaoedd cynhyrchwyr yng ngorllewin Ewrop. Sefydlwyd hefyd cyfnodolyn misol ganddynt ar bwnc busnes cydweithredol, Le travail, yn 1866. Methodd y banc a'r cyfnodolyn yn 1868, ond yn 1870 penodwyd Walras yn athro economi wleidyddol ym Mhrifysgol Lausanne. Ymddeolodd yn 1892, a fe'i olynwyd yn y swydd academaidd honno gan Vilfredo Pareto. Bu farw Léon Walras yn 75 oed yn Clarens, ger Montreux, Vaud, yng ngorllewin y Swistir.