Coney Island
Cymdogaeth ym mwrdeistref Brooklyn yn Ninas Efrog Newydd, Efrog Newydd, Unol Daleithiau America, yw Coney Island sydd yn enwog fel cyrchfan adloniant. Mae'n ffinio â Brighton Beach a Manhattan Beach i'r dwyrain, Lower New York Bay i'r de a'r gorllewin, a Gravesend i'r gogledd. Yn hanesyddol, hon oedd yr ynys fwyaf orllewinol o'r Barynysoedd Allanol ar hyd arfordir deheuol Long Island. Yn nechrau'r 20g, llenwyd y bwlch rhwng yr ynys a'r tir mawr, gan felly cysylltu Coney Island â llain o dir sydd yn cynnwys Brighton Beach a Manhattan Beach. Bellach, cyfeirir at y tair cymdogaeth honno fel gorynys Coney Island.
 | |
| Math | traeth, cymdogaeth, cyrchfan lan môr  |
|---|---|
| Enwyd ar ôl | Cwningen, Konoh, John Colman |
| Poblogaeth | 24,711 |
| Daearyddiaeth | |
| Sir | Brooklyn |
| Gwlad |  UDA |
| Arwynebedd | 1.7896818 km² |
| Talaith | Efrog Newydd |
| Yn ffinio gyda | Sea Gate, Brighton Beach, Gravesend |
| Cyfesurynnau | 40.575°N 73.9825°W |
| Cod post | 11224 |
 | |
Cadwyn o ynysigau gyda thywod symudol oedd yno adeg dyfodiad yr Ewropeaid i'r ardal yn yr 17g. Enw'r Iseldirwyr ar yr ynys fwyaf orllewinol oedd Konijn Eiland ("Ynys y Gwningen"), a gâi ei seisnigo, mae'n debyg, ar ffurf Coney Island wedi i'r Saeson gipio'r wladfa a throi Amsterdam Newydd yn Efrog Newydd. Rhennid Coney Island a'r mân-ynysoedd cyfagos gan fornentydd culion y gellid eu croesi pan fo'r môr ar drai. Caeodd rhai o'r rheiny o ganlyniad i dywod symudol a llifwaddod, ac o ddiwedd y 18g ymlaen dechreuodd y trigolion lleol lenwi'r cilfachau hyn er mwyn cysylltu'r tir yn un ynys. Erbyn 1924, cychwynnodd tirfeddianwyr lleol ac awdurdodau'r ddinas ar y gwaith o lenwi Cilfach Coney Island, a oedd yn gwahanu'r ynys oddi ar weddill Brooklyn. Yn y 1930au, wrth adeiladu priffordd y Belt Parkway, llenwyd rhan fawr o'r gilfach, gan gysylltu tir Coney Island â'r orynys i'r dwyrain, ac felly yn rhan o Long Island.
Denwyd nifer o dwristiaid i draethau'r Barynysoedd Allanol erbyn canol y 19g, a datblygodd Coney Island yn gyrchfan adloniant yn niwedd y 19g a dechrau'r 20g, a ffynnai yn sgil cysylltu'r ynys â'r rheilffordd danddaearol. Daeth yn enwog ar draws yr Unol Daleithiau am ei pharc pleserau a'i reidiau ffair, ei rhodfa ar hyd y traeth, ei bwytai, ei harddangosfeydd, a'i siopau a stondinau cofroddion. Dirywiodd yr atyniadau yn ail hanner yr 20g, er i ambell un o'r hen reidiau oroesi. Agorodd Acwariwm Efrog Newydd yn Coney Island ym 1957.[1]
Cyfeiriadau
golygu- ↑ (Saesneg) Coney Island. Encyclopædia Britannica. Adalwyd ar 22 Chwefror 2023.