Gŵyl Agor Drysau
Gŵyl theatr ryngwladol ar gyfer cynulleidfaoedd ifanc yw'r ffordd y disgrifia gwefan Gŵyl Agor Drysau ei hun. Caiff ei threfnu gan Gwmni Theatr Arad Goch a sefydlwyd fel cwmni theatr mewn addysg.
| Dechrau/Sefydlu | 1996  |
|---|---|
| Prif bwnc | drama |
Cynhelir perfformiadau, gweithdai a sgyrsiau yn nhref Aberystwyth, sef cartref yr ŵyl, ac mewn theatrau eraill yng Nghymru.
Nod yr ŵyl yw rhoi’r cyfle i blant, pobl ifanc a theuluoedd weld cynyrchiadau theatr tramor, a rhoi cyfle i raglenwyr a chynhyrchwyr rhyngwladol brofi cyfoeth celfyddydau perfformio Cymru. Mae hefyd yn darparu gofod ar gyfer deialog ac yn annog cydweithio a rhannu syniadau.
Sefydlu
golyguSefydlwyd yr ŵyl yn 1996. Cynhaliwyd y degfed ŵyl rhwng 12-16 Mawrth 2024.[1]
Yn ôl y sylfaenydd, Jeremy Turner, "Mae'r Ŵyl Agor Drysau, sy'n digwydd eto cyn hir, yn faner bwysig i ni lle ni'n gwahodd cwmni o dramor i ddod i Gymru i weithio gyda ni."[2]
Hanes
golyguCynhelir yr ŵyl oddeutu bob 3 mlynedd. Mae Gŵyl Agor Drysau wedi ei chynnal yn: 1996, 2000, 2003, 2005, 2008, 2010, 2012, 2014, 2019, a 2024.[3]
Roedd gŵyl 2024 yn cynnwys cwmnïau threatr a pherfformiadau o Gymru, Yr Eidal, Gwlad Belg, Awstralia, Iwerddon, Lloegr, a'r Ffindir.[4] Yn y 10fed Gŵyl Agor Drysau rhwng 12-16 Mawrth 2024, cynhaliwyd cyfanswm o 53 perfformiad theatrig, gan 19 cwmni o Gymru a thramor. Daeth 5,705 o gyfranogwyr neu aelodau'r gynulleidfa i’r gwahanol berfformiadau yn ystod yr ŵyl. Roedd y perfformiadau ar draws tref Aberystwyth a Cheredigion.[5]
Cennad
golyguNododd Cyfarwyddwr yr Ŵyl a Chwmni Theatr Arad Goch, Jeremy Turner amcanion yr Ŵyl yn rhaglen yr digwyddiad gyntaf yn 1996 fel a ganlyn:[3]
- Cyfle i ymarferwyr a chynulleidfaoedd o Gymru weld gwaith o dramor
- Creu llwyfan a ffenest-siop i waith o Gymru
- Rhoi cyfle i ni ystyried ein gwaith o fewn cyd-destun ryngwladol a rhyng-ddiwylliannol
- Datblygu ar y gynhadledd Theatr-Mewn-Addysg a gynhaliwyd yn flynyddol ers 14 mlynedd; trefnir trafodaethau yn ystod yr Ŵyl gan ddefnyddio'r perfformiadau a'u hamrwyiaethau fel testunau trafod; ceir trafodaeth ar 'THEATR, RHYFEL A PHOBL IFANC', ac ar 'MYTHOLEG, LLÊN WERIN A THEATR I BOBL IFANC'
- Creu cyfle i drafod perthnasedd a phwysigrwydd theatr i bobl ifainc mewn diwylliannol ac ieithoedd lleiafrifol
Cyfeiriadau
golygu- ↑ "Gŵyl Agor Drysau". Gwefan Gŵyl Agor Drysau. Cyrchwyd 29 Mawrth 2024.
- ↑ "Diwedd cyfnod a newid mawr i gwmni theatr Arad Goch". BBC Cymru Fyw. 29 Ionawr 2024.
- ↑ 3.0 3.1 "Archif". Gwefan Gŵyl Agor Drysau. Cyrchwyd 29 Mawrth 2024.
- ↑ "Amerslen". Gwefan Gŵyl Agor Drysau. Cyrchwyd 29 Mawrth 2024.
- ↑ "Gŵyl Agor Drysau Arad Goch yn dathlu 10 mlynedd gyda chefnogaeth Cronfa Ffyniant Gyffredin y DU ac ARFOR". Gwefan Cyngor Sir Ceredigion. 2024. Cyrchwyd 24 Medi 2024.
