Muriel Drinkwater
Merch ddeuddeg oed a lofruddiwyd yng Nghoedwig Penllergaer, Abertawe ar 27 Mehefin, 1946 oedd Muriel Drinkwater.
| Muriel Drinkwater | |
|---|---|
| Ganwyd | 1933  Caerfyrddin |
| Bu farw | 27 Mehefin 1946 Penlle'r-gaer |
| Dinasyddiaeth | Cymru |
Cefndir
golyguGanwyd Muriel yn ferch i Percival a Margaret Drinkwater ac arferent fyw ar fferm "Tyle Du". Hi oedd yr ifancaf o bedwar o blant.[1]
Aeth ar goll ar ei ffordd adref o Ysgol Ramadeg Tregwyr ar 27 Mehefin, 1946. Teithiodd adref ar y bws gan gyrraedd ardal Penllergaer am 4.20y.p. cyn dechrau ar y daith ugain munud i fyny'r rhiw serth trwy'r goedwig i fferm Tyle Du. Ar bont y rheilffordd, pasiodd bachgen 13 oed, Brinley Hoyles, a oedd ar ei ffordd adref ar ôl prynu 2 lb o fenyn wrth fam Muriel. Roedd y ddau ohonynt yn adnabod ei gilydd am iddynt fynychu'r un ysgol gynradd, cyn iddynt gael eu gwahanu gan arholiad yr 11-plus.
Ychydig o amser ar ôl hyn, cipiwyd Muriel ac aethpwyd a hi i mewn i'r goedwig lle trawyd hi, mwy na thebyg gan garn y gwn. Gadawyd pum briw dwfn ar ei thalcen.[2]. Pan na ddychwelodd Muriel adref, aeth ei mam i'r pentref i ddweud wrth y Cwnstabl lleol, tra bod ei thad wedi mynd i'r goedwig i chwilio amdani. Canfuwyd ei chorff trannoeth am 10.35y.b.[2] Roedd yn gwisgo ei chot ysgol las a'i menyg coch. Roedd wedi cael ei threisio a'i saethu ddwywaith[1] gyda phistol US Colt 45.
Galwyd Scotland Yard i gynorthwyo gyda'r ymchwiliad, a ganolbwyntiodd lawer ar gefndir y gwn. Danfonwyd y pistol at yr FBI yn yr Unol Daleithiau er mwyn cael gwybod mwy amdano. Dywedwyd fod y gwn wedi ei gynhyrchu yn Arfdy Springfield ym 1942 a'u bod wedi cael eu trosglwyddo i'r lluoedd Americanaidd a oedd yn ymladd yn Ewrop yn yr Ail Ryfel Byd. Fodd bynnag, gyda chynifer o arfau ar gael yn ystod y cyfnod hwn, nid oedd unrhyw gofnod o ba filwyr dderbyniodd y gwn.
Arweiniwyd y tîm i geisio dal y llofrudd gan y Prif Dditectif Inspector William "Bulldog" Chapman, a dywedir i'r achos fod yn ddraenen yn ei ystlys tan ei farwolaeth naw mlynedd yn ddiweddarach.[2] Cynhaliwyd ymchwiliad nas gwelwyd mo'i fath yn yr ardal, gyda'r heddlu'n cyfweld â thros 20,000 o ddynion yn Abertawe, Aberdar a Sir Gaerfyrddin.[1]
Claddwyd Muriel ym mynwent Eglwys Dewi Sant ym Mhenllergaer ar 2 Gorffennaf, 1946. Mynychodd 3,000 o bobl ei hangladd.[1][3] Bu farw ei rhieni heb wybod pwy oedd yn gyfrifol am farwolaeth eu merch.
Datblygiadau diweddar
golyguYm 1999, ail-agorwyd yr achos gan astudio'r dystiolaeth unwaith eto. Credwyd y byddai datblygiadau fforensig o gymorth i ddatrys yr achos. Dywedodd y Prif Dditectif Inspector Paul Bethell o Heddlu De Cymru ei fod yn credu fod y llofrudd rhwng 18 a 25 pan ddigwyddodd y drosedd [4] a olygai ei fod yn bosib fod y llofrudd dal yn fyw. Fel rhan o'r ymchwiliad newydd, defnyddiwyd DNA a oedd wedi ei ddarganfod ar got Drinkwater ond ni ddarganfuwyd neb a oedd yn cyfateb ar y cronfa ddata DNA cenedlaethol. Fodd bynnag, gellir defnyddio'r wybodaeth er mwyn adnabod unrhyw ddisgynyddion a gafodd.
Mae'r heddlu hefyd wedi edrych ar y posibilrwydd mai'r un person a laddodd Sheila Martin yn Swydd Gaint deng niwrnod yn ddiweddarach.[2]
Cyfeiriadau
golygu- ↑ 1.0 1.1 1.2 1.3 The real waking the dead: This schoolgirl's savage murder has mystified police for 62 years. Now cutting-edge forensics to rival any TV thriller have identified her killer's DNA, Dail Mail. 07-11-2008. Adalwyd ar 06-06-2010
- ↑ 2.0 2.1 2.2 2.3 Detectives link Muriel Drinkwater and Sheila Martin murders[dolen farw] TimesOnline. 23-03-2009. Adalwyd ar 06-06-2010
- ↑ Mystery of 1946 murder in woods BBC News. 5-11-2008. Adalwyd ar 06-06-2010
- ↑ Hunt on for 80-year-old Swansea killer Wales Online, 6-11-2008. Adalwyd ar 06-06-2010