Alexander Bassano

Alexander Bassano
Alexander Bassano
Ganwyd	1 Mai 1829 ; Llundain
Bu farw	21 Hydref 1913 ; Llundain
Dinasyddiaeth	Lloegr
Galwedigaeth	ffotograffydd

Ffotograffydd o Loegr oedd Alexander Bassano (1 Mai 1829 - 21 Hydref 1913). Cafodd ei eni yn Llundain yn 1829 a bu farw yn Llundain. Ei ffotograff fwyaf enwog oedd yr un o'r Iarll Kitchener a defnyddiwyd yn y posteri recriwtio Lord Kitchener Wants You yn ystod y Rhyfel Byd Cyntaf.

Bywgraffiad golygu

Roedd Alessandro Bassano yn blentyn i'r gwerthwr pysgod Eidalaidd Clemente Bassano, a'i wraig Seisnig, Elizabeth Browne. Yn ddiweddarach Seisnigodd sillafiad ei enw cyntaf i Alexander.^[1]

Derbyniodd Bassano hyfforddiant artistig cynnar gyda'r artistiaid Augustus Egg a William Beverley. Agorodd ei stiwdio gyntaf yn Regent Street ym 1850. Yna symudodd y stiwdio i Piccadilly 1859-1863. O Picadilly symudodd i Pall Mall ac yna i 25 Old Bond Street ym 1877. Hefyd roedd gan Bassano stiwdio cangen yn 132 King's Road, Brighton o 1893 i 1899.^[1]

Roedd stiwdio Old Bond Street wedi'i addurno gyda phrintiau ffotograffig carbon a phenddelwau plastr, ac roedd yn ddigon mawr i ddarparu lle i gefndiroedd panoramig 80 troedfedd o hyd wedi'i osod ar roleri, a oedd yn darparu amrywiaeth o olygfeydd awyr agored neu gefndiroedd llys. Ymysg y bobl bu Bassano yn tynnu ffotograffau portread ohonynt oedd y Prif Weinidog William Ewart Gladstone y Frenhines Victoria a Cetshwayo kaMpande. Portread o ben yr Arglwydd Kitchener Bassano gan Bassano oedd sail y poster recriwtio Rhyfel Byd Lord Kitchener Wants You. Ymddeolodd Bassano o'r gwaith yn y stiwdio tua 1903, pan adnewyddwyd yr adeilad yn helaeth a'i ail-lansio fel Bassano Ltd, Royal Photographers.

Symudodd y stiwdio unwaith eto ym 1921: symudiad a ysgrifennwyd gan y cylchgrawn Lady's Pictorial ar y pryd. Adroddodd yr erthygl am fodolaeth miliwn o negatifau, a oedd wedi'u rhifo'n systematig, y bu'n rhaid eu symud o seleri'r adeilad i'r lleoliad newydd yn 38 Stryd Dover. Daeth y cwmni yn "Bassano a Vandyk" ym 1964. Y flwyddyn ganlynol ymgorfforodd Elliott & Fry, partneriaeth ffotograffig a oedd wedi bod yn rhedeg yn Stryd Baker ers 1863. Ym 1977, daeth y cwmni yn "Industrial Photographic", yn 35 Stryd Moreton, Llundain SW1.^[2]

Mae nifer o blatiau gwydr o Stiwdio Bassano, gan gynnwys rhai gan Alexander Bassano ei hun, yn yr Oriel Portread Genedlaethol, Llundain. Mae gan Amgueddfa Llundain nifer fawr o'r platiau sy'n gysylltiedig â ffasiwn.

Cynhaliodd yr Oriel Bortreadau Genedlaethol arddangosfa o'i waith, Alexander Bassano: Victorian Photographer yn 2013, canmlwyddiant ei farwolaeth.^[3]

Bywyd personol golygu

Priododd Adelaide (née Lancaster) ym 1850. Bu iddynt fab, Clement George Alexander, a dwy ferch, Adelaide Fanny Louise a Camilla Teresa.

Bu farw yn Llundain yn 84 mlwydd oed a chladdwyd ei weddillion ym mynwent Kensal Green.^[4]

Mae yna enghreifftiau o waith Alexander Bassano yng nghasgliad portreadau Llyfrgell Genedlaethol Cymru a hefyd yng nghasgliad Yr Oriel Bortreadau Genedlaethol yn Llundain.