Bwlch Nant yr Arian

Bwlch Nant yr Arian
Math	ardal, bwlch
Daearyddiaeth
Sir	Ceredigion
Gwlad	Cymru
Cyfesurynnau	52.411667°N 3.84°W
Gwleidyddiaeth
AS/au Cymru	Elin Jones (Plaid Cymru)
AS/au y DU	Ben Lake (Plaid Cymru)
	[golygwch ar Wicidata]

Lleolir Bwlch Nant yr Arian ar ffordd yr A44 rhwng Goginan a Phonterwyd, Ceredigion. Yno mae Canolfan Ymwelwyr Bwlch Nant yr Arian, sy'n cael ei rhedeg gan Gyfoeth Naturiol Cymru, ac, ers 2020 bu'n rhan o Goedwig Genedlaethol i Gymru. Mae nifer o lwybrau cerdded a beicio mynydd o wahanol safon yn cychwyn o'r ganolfan, yn ogystal â llwybr ceffyl.^[1]

Mae cyfleusterau'r ganolfan yn cynnwys caffi, siop grefftau, byrddau picnic, maes chwarae, adnoddau addysgol, toiledau, cawodydd a maes parcio. Mae hefyd modd gwylio nifer o adar yn y cuddfanau ger llaw'r ganolfan. Caiff y barcud coch ei fwydo pob dydd am 3 o'r gloch (2 yn y gaeaf), ac mae'n bosib gwylio degau ohonynt ar yr adeg hon.^[1]

Cafodd y ganolfan ymwelwyr ei hail-adeiladu yn 2005, a chafodd ei chynllunio i weddu gyda'r tirwedd ac i fod yn gyfeillgar i'r amgylchedd. Caiff ei gwresogi gan sglodion pren sy'n ddeunydd gwastraff o'r gwaith coedwigaeth ar y safle. Mae'r to wedi ei orchuddio gyda phlanhigion sedum sy'n dal ac yn ffiltro dŵr sy'n cael ei ddefnyddio yn y toiledau a'r orsaf golchi beiciau.

Enillodd y ganolfan Wobr Busnes Ceredigion yn 2006.