Casgliad y Werin
Mae Casgliad y Werin (Saesneg: People's Collection Wales) yn wefan ac adnodd ac gyfer llwytho delweddau (ffotograffau a deunydd eraill wedi ei sganio) a sain, sy'n adrodd hanes a bywyd Cymru. Lansiwyd ar 2 Awst 2010.[1]
Cennad a Rheolaeth golygu
Yn ôl wefan Casgliad y Werin, cennad yr archif yw i ddarparu gwefan i lwytho ffotograffau sy'n dal storïau amdanynt ac yn cyfoethogi ein gwybodaeth am Gymru a'i phobl. Mae'r fenter hefyd yn cynnig cymorth a hyfforddiant i unrhywun sydd â diddordeb mewn digido casgliadau mawr a phrosiectau cymunedol hanesyddol.
Caiff y fenter a’r wefan eu hariannu gan Lywodraeth Cymru a’u rhedeg mewn partneriaeth gyda: Comisiwn Brenhinol Henebion Cymru; Llyfrgell Genedlaethol Cymru ac Amgueddfa Cymru. Dros y blynyddoedd cafwyd cydweithrediad a pharteriaethau gyda 'Llafur: Cymdeithas Hanes Pobl Cymru', BBC Cymru, Eisteddfod Genedlaethol Cymru, Cadw, Croeso Cymru, Y Cerddwyr (The Ramblers) ac S4C.
Hyd at 2019 dim ond trwydded CC-NC oedd yn cael ei defnyddio, a olygai na all busnes, ysgolion na chymdeithasau ddefnyddio'r lluniau mewn llyfr, neu unrhyw gyhoeddiad, neu ddefnydd masnachol arall; golygai hefyd na allai Wicipedia mo'u defnyddio.[2]
Gall unigolion o'r cyhoedd, grwpiau neu gydmeithasau ychwanegu straeon ac atgofion ar ffurf lluniau, fideos a phenawdau er mwyn rhannu gwybodaeth am hanes at atgofion:
- Cymuned
- Teulu
- Pentrefi, trefi a dinasoedd
- Diwydiannau
- Traddodiadau
Hanes golygu
Lansiwyd Casgliad y Werin yn 2010 [3] ac ymddengys y cafwyd ail-lansiad yn 2012 yn nghwmni'r darlledydd ac awdur Huw Edwards i gyd-fynd gyda chyfres deledu 'The Story of Wales' ar y BBC Wales.[4]
Bu'r adnodd, maes o law, yn archif ar gyfer partneriaethau eraill megis i gofio a chofnodi'r Rhyfel Byd Cyntaf.[5]
Cofnodwyd (nid yw'r dyddiad yn glir) bod dros 5,000 o gyfraniadau gan grwpiau neu unigolion ar y wefan ac mae 172 o grwpiau’n cymryd rhan weithredol yn y project.[3] ac erbyn 2019 roedd dros 20,000 o eitemau wedi eu sganio a'u harchifo ar y wefan.[6]
Dolenni golygu
Cyfeiriadau golygu
- ↑ https://www.bbc.co.uk/blogs/waleshistory/2010/08/launch_peoples_collection_wales.html
- ↑ casgliadywerin.cymru; adalwyd 15 Mai 2019.
- ↑ 3.0 3.1 https://amgueddfa.cymru/ymgynghori/dod_i_ben/casgliadau_arlein/
- ↑ cadw.gov.wales; adalwyd 15 Mai 2019.
- ↑ "copi archif". Archifwyd o'r gwreiddiol ar 2019-05-15. Cyrchwyd 2019-05-15.
- ↑ cbhc.gov.uk; adalwyd 15 Mai 2019.