Jordi Cuixart i Navarro
Gŵr busnes a chenedlaetholwr o Gatalwnia yw Jordi Cuixart i Navarro (ganwyd 22 Ebrill 1975), sy'n ymgyrchydd dros iaith a diwylliant Catalaneg. Bu'n Llywydd Diwylliannol mudiad Omnium ers mis Rhagfyr 2015.[1]
| Jordi Cuixart i Navarro | |
|---|---|
 | |
| Ganwyd | Jordi Cuixart Navarro  22 Ebrill 1975 Santa Perpètua de Mogoda |
| Man preswyl | Sabadell, Santa Perpètua de Mogoda |
| Dinasyddiaeth | Sbaen |
| Alma mater |
|
| Galwedigaeth | person busnes, ymgyrchydd |
| Swydd | Llywydd Òmnium Cultural, cadeirydd, cadeirydd |
| Priod | Txell Bonet |
| Perthnasau | Josep Navarro Zapata |
| Gwobr/au | Gwobr 31 Rhagfyr, Creu de Sant Jordi |
| llofnod | |
 | |
Cefndir golygu
Ganed Cuixart yn Navarro yn Santa Perpètua de Mogoda, yn y Vallès Occidental, Catalwnia yn fab i fam o Murcia a thad o Gatalwnia.
Gwaith golygu
Cuixart yw sylfaenydd a phennaeth Aranow, cwmni sy'n cynhyrchu peiriannau pecynnu yn Barcelona. Mae'n aelod o Ganolfan Metelegol Catalwnia ac yn noddwr a sefydlwr FemCAT cymdeithas i entrepreneuriaid o Gatalwnia.
Gweithgaredd diwylliannol a chenedlaetholgar golygu
Ymunodd ag Òmnium Cultural, mudiad i hyrwyddo iaith a diwylliant Catalaneg, ym 1996. Gwasanaethodd fel trysorydd ac is-lywydd y mudiad cyn cael ei benodi yn llywydd arni ar 19 Rhagfyr 2015.[2]
Cymerodd ran yn yr ymgyrch wleidyddol Ara es l'hora (nawr yw'r awr) a oedd yn ceisio troi etholiadau i senedd Catalwnia 2015 yn bleidlais o blaid annibyniaeth i'r wlad. O dan ei arweiniad, trefnodd Omnium ymgyrch o'r enw Lluites compartides (rhannu'r frwydr) sy'n anrhydeddu gweithredwyr brwydrau cymdeithasol Catalaneg ers y 1950au, a oedd yn ymgyrchu i greu gwlad well a thecach.
Bu'n gyfrifol am ehangu gwaith Omnium y tu hwnt i'r frwydr iaith a diwylliant i geisio creu consensws ymysg pobl y wlad ar faterion cymdeithasol. Trefnodd gyfarfodydd, trafodaethau a chynadleddau a gynhaliwyd o Dachwedd 2016 i Ebrill 2017 ar amrywiol bynciau, megis ymwrthod â gwleidyddiaeth cefnogwyr cyfoes Franco; heddychiaeth, amddiffyn y Gatalaneg, brwydrau undebau llafur a symudiadau amgylcheddol.
O dan ei arweinyddiaeth daeth Omniwm yn bartner mewn menter Lliures de Pobresa, Exclusió i Desigualtats (rhydd o dlodi, allgau ac anghydraddoldeb), sef ymgyrch gan y gymdeithas sifil yn erbyn effeithiau parhaus yr argyfwng economaidd. Mae'r ymgyrch yn beirniadu diffyg gweithredu'r awdurdodau cyhoeddus. Mae wedi bod yn hynod o feirniadol wladwriaeth Sbaen am y modd y mae wedi ymosod yn systematig ar bolisïau cymdeithasol a gwrth tlodi llywodraeth Catalwnia trwy ei ddefnydd o'r Llys Cyfansoddiadol.
Carcharu golygu
Ar 4 Hydref, 2017, cyhuddwyd Jordi Cuixart a Jordi Sànchez i Picanyol (llywydd Cyngres Genedlaethol Catalwnia) o greu cynnwrf yn erbyn y wladwriaeth am eu rhan wrth drefnu refferendwm Annibyniaeth Catalwnia, 1 Hydref 2017. Ar 16 Hydref, 2017 cafodd y ddau eu carcharu am gyfnod ataliol er mwyn i'r awdurdodau chwilio am brawf o'u troseddau honedig. Arweiniodd eu carchariad at brotestiadau enfawr yng Nghatalwnia[3] a chafodd eu carchariad ei feirniadu gan Amnest Rhyngwladol am fod yn rhy llawdrwm[4].
Cyfeiriadau golygu
- ↑ ABC ESPAÑA Jordi Cuixart, la industria del independentismo adalwyd 19 Hydref 2017
- ↑ gwefan Omnium Jordi Cuixart, proclamació com a president d'Òmnium Archifwyd 2017-09-20 yn y Peiriant Wayback. adalwyd 19 Hydref 2017
- ↑ Golwg360 Mariano Rajoy yn rhybuddio Catalwnia i “ymddwyn yn synhwyrol” adalwyd 19 Hydref 2017
- ↑ gwefan Amnest SPAIN: CHARGES FOR SEDITION AND PRE-TRIAL DETENTION AGAINST JORDI CUIXART AND JORDI SANCHEZ ARE EXCESSIVE adalwyd 19 Hydref 2017