Afon Cwmnantcol
Afon yn ne Gwynedd, Cymru, yw Afon Cwmnantcol. Mae'n tarddu ym mryniau'r Rhinogau yn ardal Ardudwy ac yn llifo i Afon Artro ger Pentre Gwynfryn. Hyd: tua 6 milltir.
 Afon Cwmnantcol o Bont Cwmnantcol | |
| Math | afon  |
|---|---|
| Daearyddiaeth | |
| Sir | Gwynedd |
| Gwlad |  Cymru |
| Cyfesurynnau | 52.8207°N 4.0743°W |
 | |
Llyn Perfeddau, rhwng Y Llethr a Rhinog Fach, yw prif darddle'r afon. Ymuna ffrwd arall ger Bwlch Drws Ardudwy ac wedyn mae'r afon yn llifo ar gwrs gorllewinol i lawr Cwm Nantcol, sy'n rhoi iddi ei henw. Tua milltir i lawr o Fwlch Drws Ardudwy mae'n llifo heibio ffermdy hen Maesygarnedd, cartref John Jones, Maesygarnedd (1597–1660), un o'r gwŷr a arwyddodd warant marwolaeth y brenin Siarl I o Loegr a brawd-yng-nghyfraith i Oliver Cromwell, Arglwydd Amddiffynnwr Lloegr.
Mae'n cyrraedd ei chymer ar afon Artro ger gwarchodfa natur Coed Lletywalter, chwarter milltir i'r dwyrain o Bentre Gwynfryn, ar ôl llifo dan Bont Cwmnantcol sy'n cael ei chroesi gan y lôn sy'n dringo'r cwm.
