Bylchau (barddoniaeth)
Cyfrol o gerddi Aneirin Karadog a gyhoeddwyd gan Gyhoeddiadau Barddas a gyhoeddwyd yn 2016 yw Bylchau.
| Enghraifft o'r canlynol | fersiwn, rhifyn neu gyfieithiad  |
|---|---|
| Awdur | Aneirin Karadog |
| Cyhoeddwr | Cyhoeddiadau Barddas |
| Iaith | Cymraeg |
| Dyddiad cyhoeddi | 2016 |
| Lleoliad cyhoeddi | y Bala |
Colled bersonol wnaeth sbarduno Aneirin Karadog i ddwyn ynghyd ei ail gyfrol o gerddi, sef marwolaeth ei gyfnither Cathryn bron i ddwy flynedd yn ôl.
Mae’r gyfrol hon hefyd yn myfyrio ar y bylchau sy’n cael eu gadael ym mywyd y genedl yn dilyn marwolaeth rhai o gewri ein llên a’n diwylliant. Ond wrth ystyried goblygiadau colled, mae’r bardd hefyd yn cael ei gymell i feddwl am yr hyn sy’n tyfu yn y bylchau hynny ac i ddathlu yr hyn sy’n cael ei feithrin o’r newydd – genedigaeth ei ferch, Sisial, cael ei benodi’n Fardd Plant Cymru, arwyr megis Nigel Owens, Jamie Bevan, Chris Coleman ac Osian Roberts a sefydlu Radio Beca.
Mae Bylchau hefyd yn cynnwys cerddi sy’n archwilio perthynas y bardd â Llydaw, a’r ffaith iddo gael ei fagu ar aelwyd amlieithog yn sŵn y Gymraeg a’r Llydaweg. Mae'r gyfrol yn gofyn cwestiynau megis: Beth mae bod yn hanner Llydäwr yn ei olygu i Aneirin Karadog? A sut mae’n dylanwadu ar ei agwedd tuag at iaith a diwylliant Cymru? Sut mae byw yn rhan o fwy nag un diwylliant?
Trwy ei gerddi cynganeddol a’i gerddi rhydd telynegol, mae Aneirin Karadog yn fardd sy’n cynnig byd-olwg gwahanol i weddill beirdd Cymru.