Harold Laski

Gwyddonydd gwleidyddol, academydd, a gwleidydd Seisnig oedd Harold Joseph Laski (30 Mehefin 1893 – 24 Mawrth 1950).

Harold Laski
Ganwyd	30 Mehefin 1893  Manceinion
Bu farw	24 Mawrth 1950  Ysbyty'r Santes Fair
Dinasyddiaeth	y Deyrnas Unedig
Alma mater	Coleg Newydd Ysgol Ramadeg Manceinion
Galwedigaeth	economegydd, gwleidydd, ysgrifennwr, academydd, gwyddonydd gwleidyddol, damcaniaethwr gwleidyddol, cyfieithydd
Swydd	Labour Party Chair
Cyflogwr	Ysgol Economeg Llundain
Plaid Wleidyddol	y Blaid Lafur

Ganed ym Manceinion i deulu o Iddewon dosbarth-canol. Yn 1911, priododd â Frida Kerrey, Cristnoges, heb sêl bendith ei deulu. Astudiodd ewgeneg am gyfnod byr yng Ngholeg Prifysgol Llundain cyn iddo gychwyn ar gwrs hanes yng Ngholeg Newydd, Rhydychen. Derbyniodd ei radd yn 1914, a gweithiodd am gyfnod i bapur newydd y Daily Herald. Aeth i Ogledd America i addysgu gwyddor gwleidyddiaeth ym Mhrifysgol McGill, Montréal, o 1914 i 1916, ac yna ym Mhrifysgol Harvard o 1916 i 1920. Yno fe fu'n gyfeillgar â sawl barnwr a chyfreithegwr o fri, gan gynnwys Oliver Wendell Holmes, Jr., Louis Brandeis, a Felix Frankfurter.

Dychwelodd Laski i Loegr yn 1920 ac ymgyrchodd ar gyfer y Blaid Lafur yn etholiad cyffredinol y Deyrnas Unedig, 1923. Penodwyd yn athro yn Ysgol Economeg Llundain yn 1926 ac addysgodd wyddor gwleidyddiaeth yno nes ei farwolaeth. Yn ystod y Dirwasgiad Mawr, trodd Laski yn Farcsydd, a dadleuodd y gallai trafferthion economaidd cyfalafiaeth arwain at gwymp democratiaeth. Yn ystod yr Ail Ryfel Byd, gweithiodd yn gynghorwr i'r Ddirprwy Brif Weinidog Clement Attlee. Yn 1945, penodwyd Laski yn gadeirydd y Blaid Lafur. Bu farw yn Llundain yn 56 oed.

Llyfryddiaeth

• Authority in the Modern State (1919).
• The Foundations of Sovereignty, and Other Essays (1921).
• Grammar of Politics (1925).
• The State in Theory and Practice (1935).
• The Rise of European Liberalism: An Essay in Interpretation (1936).
• Parliamentary Government in England: A Commentary (1938).
• The American Presidency: An Interpretation (1940).
• Reflections on the Revolution of Our Time (1943).
• Faith, Reason, and Civilization: An Essay in Historical Analysis (1944).
• The American Democracy: A Commentary and Interpretation (1948).