Robert Bridges

Bardd o Loegr oedd Robert Seymour Bridges (23 Hydref 1844 – 21 Ebrill 1930).

Robert Bridges
Ganwyd	23 Hydref 1844  Caint
Bu farw	21 Ebrill 1930  Rhydychen
Dinasyddiaeth	y Deyrnas Unedig
Alma mater	Coleg Corpus Christi, Rhydychen Coleg Eton Barts and The London School of Medicine and Dentistry
Galwedigaeth	bardd, llenor
Swydd	Bardd Llawryfog y Deyrnas Unedig
Tad	John Thomas Bridges
Mam	Harriett Elizabeth Affleck
Priod	Monica Bridges
Plant	Elizabeth Daryush, Margaret Bridges, Edward Bridges
Gwobr/au	Urdd Teilyngdod
llofnod

Fe'i ganwyd yn Walmer, Caint. Addysgwyd yng Ngholeg Eton a Choleg Corpus Christi, Rhydychen. Aeth ymlaen i astudio meddygaeth yn Ysbyty Sant Bartholomeus, Llundain, gan fwriadu ymarfer nes iddo gyrraedd deugain oed ac yna ymddeol er mwyn llunio barddoniaeth. Roedd yn feddyg nes iddo gael ei orfodi i ymddeol ym 1882 gan glefyd yr ysgyfaint. Wedyn fe wnaeth ymroi ei hun i fywyd llenyddol.

Yn 1884 priododd Mary Monica Waterhouse, merch i'r pensaer Alfred Waterhouse, a threuliodd weddill ei oes yng nghefn gwlad Berkshire, yn gyntaf yn Yattendon, wedyn yn Boars Hill (yn agos i Rydychen), lle bu farw.

Fe'i penodwyd yn Fardd Llawryfog ym 1913, yn dilyn marwolaeth Alfred Austin. Fe'i dilynwyd gan John Masefield ar ôl ei farwolaeth ei hun. Er gwaethaf ei fod yn Fardd Llawryfog, ni fu Bridges erioed yn fardd adnabyddus iawn nes iddo gyflawni peth poblogrwydd ychydig cyn ei farwolaeth gyda The Testament of Beauty (1929).

Tra'n fyfyriwr yn Rhydychen, daeth yn gyfaill i'r bardd Gerard Manley Hopkins (1844–1889). Gellir priodoli enwogrwydd Hopkins i raddau helaeth i ymdrechion Bridges i drefnu cyhoeddi argraffiad cyflawn ei farddoniaeth (1918).

Roedd yn dad i'r bardd Elizabeth Daryush (1887–1977).

Llyfryddiaeth

Barddoniaeth

• The Growth of Love (1876, 1889, 1898)
• Eros and Psyche (1885, 1894)
• Shorter Poems, cyfrolau I–IV (1890)
• Shorter Poems, cyfrolau I–V (1894)
• New Poems (1899)
• Yattendon Hymnal (1899)
• October and Other Poems (1920)
• New Verse (1926)
• The Testament of Beauty (1929)

Dramâu fydryddol

• Prometheus the Firegiver (1883)
• Nero, rhan I, rhan II (1885, 1894)
• The Feast of Bacchus (1889)
• Pacilio (1890)
• The Return of Ulysses (1890)
• The Christian Captives (1890)
• The Humours of the Court (1893)
• Demeter (1905)

Rhyddiaeth

• Milton's Prosody (1893, 1901, 1921)
• Keats (1895)
• The Spirit of Man (1916)
• The Necessity of Poetry (1918)

Rhagflaenydd: Alfred Austin

Bardd Llawryfog y Deyrnas Unedig 25 Gorffennaf 1913 – 21 Ebrill 1930

Olynydd: John Masefield

Eginyn erthygl sydd uchod am Sais neu Saesnes. Gallwch helpu Wicipedia drwy ychwanegu ato.