Samuel von Pufendorf

Cyfreithegwr ac hanesydd o'r Almaen oedd Samuel Freiherr von Pufendorf (8 Ionawr 1632 – 13 Hydref 1694) sydd yn nodedig am ei gyfiawnhad dros y ddeddf naturiol a'i gyfraniadau cynnar at ddamcaniaeth y gyfraith ryngwladol.

Samuel von Pufendorf
Ganwyd	8 Ionawr 1632  Dorfchemnitz
Bu farw	26 Hydref 1694  Berlin
Dinasyddiaeth	Etholaeth Sacsoni, Sweden
Alma mater	Prifysgol Leipzig Prifysgol Friedrich Schiller Jena Gymnasium St. Augustin
Galwedigaeth	cyfreithegwr, athronydd, hanesydd, academydd, economegydd, llenor
Blodeuodd	1669, 1686, 1759
Cyflogwr	Prifysgol Lund, Sweden Prifysgol Ruprecht Karl Heidelberg
Adnabyddus am	On the Duty of Man and Citizen According to Natural Law

Ganed Samuel Pufendorf yn Dorfchemnitz, ger Thalheim, yn Etholyddiaeth Sacsoni, un o daleithiau'r Ymerodraeth Lân Rufeinig. Dylanwadwyd arno yn gryf gan weithiau Thomas Hobbes a Hugo Grotius. Dadleuai Pufendorf bod cyfraith y cenhedloedd (ius gentium) yn gangen o'r ddeddf naturiol, ac nid cyfundrefn gyfreithiol trwy ordinhad y ddynolryw. Pwysleisiai hawl yr unigolyn i gydraddoldeb a rhyddid, a honnai taw heddwch yw cyflwr naturiol y byd. Cefnogai oruchafiaeth y wladwriaeth dros yr eglwys mewn cylchoedd seciwlar y gymdeithas, a chafodd y farn honno ddylanwad fawr ar gydberthynas yr eglwys a'r wladwriaeth yn yr Almaen yn y 18g. Ei brif draethodau cyfreithiol yw Elementa jurisprudentiae universalis (1661), De jure naturae et gentium (1672), a De habitu religionis Christianae ad vitam civilem (1687).

Addysgodd Pufendorf gyfreitheg ym mhrifysgolion Heidelberg o 1661 i 1668 ac yn Lund o 1668 i 1677. Ei brif waith ar bwnc hanes yw De statu imperii Germanici (1667). Fe'i benodwyd yn hanesydd brenhinol yn llysoedd Stockholm a Berlin yn niwedd ei oes. Rhoddwyd teitl barwn (Freiherr) iddo ym 1694, ychydig fisoedd cyn ei farw ym Merlin yn 62 oed.