Sion Trefor (m. 1589)

Uchelwr Cymreig a milwr ym myddin Harri VIII oedd Sion Trefor (hefyd John Trevor) a fu farw ym Mehefin 1589. Roedd yn or-ŵyr i Syr Richard Trefor (fl. 1500), 4ydd mab John Trevor "hên" a'r 19eg yn ei ddisgyniad o dad i dad o Tudur Trefor (gw. Trevor, Brynkynallt), a gawsai'r ystad trwy briodas Mallt, aeres Dafydd ap Gruffydd, Allington (m. 1476 ). Yn 1574 roedd yn parhau i lynnu wrth grefydd Rhufain, er gwaethaf Diwygiad Protestannaidd Lloegr.

Sion Trefor
Beddrod Sion yn Eglwys yr Holl Seintiau, Gresffordd ger Wrecsam.
Ganwyd	Yr Orsedd
Bu farw	15 Gorffennaf 1589, 1589  Llundain
Dinasyddiaeth	Cymru
Galwedigaeth	milwr
Tad	John Trevor
Mam	Ann Broghton
Priod	Mary Bruges
Plant	Sion Trevor, Richard Trefor, Sackville Trevor, Winifred Trevor, Thomas Trevor

Beddrod Sion; mae'r testun ar y feddrod yn uniaith Gymraeg. Gresffordd ger Wrecsam.

Mae Sion Trefor yn fwyaf nodedig, efallai, am godi Trefalun (neu Drefalyn) yn 1576, ym mhentref Yr Orsedd (Rossett) yn ardal Maelor, plasty enfawr ac am fod yn dad i rai o uchelwyr mwyaf pwerus gogledd-ddwyrain Cymru.

Bu'n ymladd yn rhyfeloedd Harri VIII yn Ffrainc, gyda theulu pwerus Sackville yn ei noddi.

Beddrod

Bu farw, fel y nodir ar ei gofeb yn "Lhundain" (Llundain) ond roedd wedi gorchymyn i'w gorff gael ei ddychwelyd i Faelor i'w gladdu gyda chyrff ei hynafiaid. Mae ei gofeb alabaster yn Eglwys yr Holl Saint, Gresffordd, yn hynod a chain, gyda thestun uniaith Gymraeg yn nodi manylion ei fywyd a'i ddisgynyddion. Noda'r feddrodgre:

Sion Trevor, Trevalyn. Ysgweier y 19 o dad i dad o Dudur Trefor, a fu farw yn Lhundain y mis Mehevin 1589. Ei escyrn ef, ei vab a'i aer Syr Richard Trevor a barodd eu mudo i'r feddrod honn i orphwys gyda'i henafiaid, fel wrth ymado a'r byd y dymunodd.

Blynyddoedd ei ieincktid a drosfwriodd ef yn Rhyveloedd Frainck dann Vrenin Henry 8. Ei ganol-fyd gyfoesodd ef yn ymdaith deirth-wledydd. Ei ddiwedd-oes a gartrefodd ef yn Llywodraeth a gwasanaeth ei enedigaeth wlad.

Ef a briododd Mary, merch George Bridges, Ysgweiar, ag a fu iddo o honi bump o veibion a dwy o verched, sef..

1. Syr Richard Trevor, Marchog Depvi y l'tenant (Dirprwy-raglaw?) y Sir honn yr hwn a briododd Katrin, merch Roesier Puleston o Emral, Ysgweier, f(ab?) Syr Edward Puleston, Marchog
2. Sion Trevor, Golygwr ar Lynges ardderchawg y Frenhines, yr hwn a briododd Marged merch Hywel Trevanian o (?)arihays yn Gernyw, Ysgweier, vab Syr Hyw Trevanian, Marchog ar ôl ei dad.
3. Rondl Trevor, a fu farw yn gyvagos ar ôl ei dad
4. Sackvil Trevor, Capten vn amryw o Longau'r Vrenhines
5. Tomas Trevor, Myfyriwr y Gyfraith
6. Winiffred a briodes Edward Puleston o Aivnton Ysgweier ag
7. Ermin a briodes Robert Lloid o I(?)ersedd Ysgweier.

Y teulu Trefor

Ceir sawl aelod dylanwadol iawn o'r teulu gan gynnwys (yn nhrefn dyddiad marw):

• Richard Trefor (m. 1614), aelod o Doctors’ Commons (18 Chwefror 1598), a barnwr yn llys y llynges, i John Trevor ( Coote, Civilians, 65; McClure, Letters of J. Chamberlain, i, 544-5).
• Syr John Trefor I (m. 1630), gweinydd y llynges a gwleidydd.
• Syr Sackville Trefor (c.1565-1633), morwr.
• Syr Richard Trefor (1558 - 1638), milwr, gwleidydd a gweinyddwr yn Iwerddon.
• John Trevor (g. c. 1652).
• Syr Thomas Trefor (1572 - 1656), barnwr.
• Syr John Trevor II (1596–1673), seneddwr.
• Syr John Trefor III (1626 - 1672), ysgrifennydd y wladwriaeth.
• Syr Thomas Trefor (1612 - 1676), cyfrifydd y Duchy of Lancaster.
• Richard Trefor (m. 1676), hynafiaethydd .
• Thomas Trefor (1658 - 1750), y barwn Trefor (o Drefalun) 1af, a barnwr.
• Richard Trefor (1707 - 1771), esgob Tyddewi a Durham.

Gweler hefyd

• Trefor, Wrecsam
• Ieuan Trefor I - Clerigwr Cymreig oedd Ieuan Trefor I (bu farw 1357), a wasanaethodd fel Esgob Llanelwy o 1346 hyd ei farw yn 1357.
• Ieuan Trefor II - Esgob Llanelwy rhwng 1394 a 1408 ac awdur Cymraeg
• George Rice-Trevor, 4ydd Barwn Dinefwr - (1795 – 1869); AS