Swig
Cyfres o raglenni teledu adloniant oedd Swig a ddarlledwyd ar S4C yn y 1980au a'r 1990au. Roedd y cyfresi wedi ei anelu at bobl ifanc ac yn cynnig golwg 'amgen' ar wythnos yr Eisteddfod Genedlaethol. Roedd y rhaglenni yn gymysgedd o sgetshis dychanol, eitemau am bynciau llosg a phrotestiadau, adolygiadau, cyfweliadau a pherfformiadau gan grwpiau. Cynhyrchwyd y cyfresi gan HTV Cymru.
| Enghraifft o'r canlynol | cyfres deledu  |
|---|---|
| Dechreuwyd | 1987 |
| Iaith wreiddiol | Cymraeg |
Darlledwyd y gyfres gyntaf - Swig o Port - yn ystod wythnos Eisteddfod Genedlaethol Cymru Bro Madog 1987 a gynhaliwyd ym Mhorthmadog. Dangoswyd rhaglen hanner awr bob nos rhwng dydd Llun a dydd Gwener gyda'r rhaglen wedi ei ffilmio ar y diwrnod. Cyflwynwyd y gyfres gyntaf gan Nia Roberts a Kevin Davies gyda'r actorion Dyfan Roberts a Dewi Rhys yn perfformio sgetshis yn dynwared enwogion a chwarae cymeriadau.
Parhaodd y cyfresi hyd 1993, drwy addasu'r enw 'Swig' ar gyfer lleoliadau'r Eisteddfod, gydag amryw o gyflwynwyr. Yn y 1990au perfformiwyd sgetshis gan yr actorion Rhys Ifans, Meirion Davies a Lisa Palfrey a chyflwynwyd y cymeriadau 'Hywel Pop', 'Horni', 'Dazzer Dean "The Epileptic Sex Machine"' ac 'Y Ddau Ffranc'. Aeth cymeriadau y ddau Ffranc i ymlaen i gael sioe eu hunain Pobl y Chyff.
Cyfresi
golygu- 1987 - Swig o Port (Eisteddfod Genedlaethol Cymru Bro Madog 1987)
- 1988 - Swig o 'Niw'Port (Eisteddfod Genedlaethol Cymru Casnewydd 1988)
- 1989 - Un Swig Arall (Eisteddfod Genedlaethol Cymru Llanrwst 1989)
- 1990 - Swig o Rhym (Eisteddfod Genedlaethol Cymru Cwm Rhymni 1990)
- 1991 - Swig o Fama (Eisteddfod Genedlaethol Cymru yr Wyddgrug 1991)
- 1992 - Swig o Ba'cardi (Eisteddfod Genedlaethol Cymru Aberystwyth 1992)
- 1993 - Swig o Ffilth (Eisteddfod Genedlaethol Cymru Llanelwedd 1993)
Dolenni allanol
golygu- Un Swig Arall ar BBC iPlayer