Gerallt Pennant

Cyflwynydd teledu a radio Cymreig yw Gerallt Pennant (ganwyd 22 Ionawr 1960).

Gerallt Pennant
Gerallt Pennant ar raglen deledu Ffermio yn 2004
Ganwyd	22 Ionawr 1960  Bangor
Dinasyddiaeth	Cymru
Alma mater	Ysgol Gynradd Garndolbenmaen Ysgol Dyffryn Nantlle Prifysgol Cymru Y Drindod Dewi Sant
Galwedigaeth	cyflwynydd radio

Bywgraffiad

Ganwyd Pennant ym Mangor, ond magwyd ar fferm Derwin Bach, Bryncir, Eifionydd. Addysgwyd yn Ysgol Gynradd Garndolbenmaen, Ysgol Uwchradd Dyffryn Nantlle ym Mhen-y-groes, a graddiodd mewn Cymraeg a Hanes Cymru yng Ngholeg y Drindod, Caerfyrddin. Mae’n byw ym Mhorthmadog ers 1997.

Gyrfa

Wedi graddio, fe weithiodd fel athro ysgol gynradd am ddwy flynedd. Yng nghanol yr 1980au, ymunodd â'r BBC yng Nghaerdydd fel ymchwilydd ar raglenni teledu plant. Aeth yn ei flaen i gynhyrchu rhaglenni garddio, a'r rhaglen Ar y Tir o Fangor.

Bu'n cyflwyno rhaglenni fel Ffermio rhwng 1997 a 2005 a bu hefyd yn cyflwyno rhaglen hynod o boblogaidd ar S4C sef Clwb Garddio. Cafodd y cyfle hefyd i gynhyrchu a chyfarwyddo cyfres deledu Iolo Williams, sef Crwydro ar S4C.

Mae Gerallt yn parhau i gyflwyno rhaglen radio boblogaidd am fyd natur, Galwad Cynnar ar Radio Cymru bob bore Sadwrn.

Ers 2007, mae'n ohebydd y gogledd ar raglen Wedi 7 ac yna Heno ar S4C.

Dolenni allanol

• Gerallt Pennant ar Twitter
• Datganiad i'r wasg gan S4C.
• Radio Cymru - Galwad Cynnar

Eginyn erthygl sydd uchod am Gymro neu Gymraes. Gallwch helpu Wicipedia drwy ychwanegu ato.