Marshall Claxton
Roedd Marshall Claxton (12 Mai 1811 - 28 Gorffennaf 1881) yn arlunydd Saesnig a oedd yn darlunio tirwedd, portreadau a pheintiadau testunol yn bennaf[1]
| Marshall Claxton | |
|---|---|
 | |
| Ganwyd | 12 Mai 1813  Bolton |
| Bu farw | 28 Gorffennaf 1881 Llundain |
| Dinasyddiaeth | Teyrnas Unedig Prydain Fawr ac Iwerddon |
| Galwedigaeth | arlunydd, cerflunydd, ffotograffydd |
| Adnabyddus am | Lady Godiva |
| Arddull | peintio genre, portread |
| Plant | Florence Claxton, Adelaide Sophia Claxton |
Teulu golygu
Ganwyd Claxton yn Bolton, Swydd Gaerhirfryn, yn fab i weinidog Methodistiaid Wesleaidd, y Parch. Marshall Claxton, a'i wraig Diana.
Ym 1837 priododd Sophia (1812–1890), merch Joshua Hargrave YH o Blackheath, Swydd Caint; bu iddynt ddwy ferch a mab. Bu'r ddwy ferch Florence ac Adelaide yn artistiaid hefyd a chawsant eu harddangos yn yr Academi Frenhinol.
Addysg golygu
Astudiodd Marshall o dan John Jackson, R.A., ac yn ysgol yr Academi Frenhinol lle ymrestrodd ar 26 Ebrill 1831. Cafodd bendith ei dad i astudio o dan Jackson gan fod Jackson hefyd yn aelod brwd o'r Eglwys Fethodistaidd.
Gyrfa golygu
Cafodd ei ddarlun cyntaf ei arddangos yn yr Academi Frenhinol yn 1832 sef portread o'i dad. Yn y blynyddoedd dilynol dangoswyd tua 30 o'i luniau yn arddangosfeydd yr Academi. Yn 1834 enillodd y fedal gyntaf yn yr ysgol baentio, a chafodd fedal aur Cymdeithas y Celfyddydau yn 1835 am ei ddarlun o Syr Astley Cooper. O 1837 i 1842 bu'n gweithio yn yr Eidal cyn dychwelyd i Lundain, gan ennill gwobr o £ 100 am ei Alfred the Great in the Camp of the Danes. Roedd y wobr yn wobr gysur am "lun da" am ddarlun a fethodd i ddod i'r brig mewn cystadleuaeth i greu ffresgoau ar gyfer y senedd dai newydd yn San Steffan.
Ym 1850 aeth Claxton i Sydney, Awstralia, gyda chasgliad mawr o luniau, ond ni chafodd fawr o lwyddiant wrth eu gwerthu. Tra yn Sydney paentiodd ddarlun mawr ar destun Beiblaidd, Gadewch i blant bychain ddyfod ataf Fi a gomisiynwyd gan y Farwnes Burdett-Coutts. Disgrifiwyd y llyn yn y cylchgrawn Household Words fel 'y darlun pwysig cyntaf' a baentiwyd yn Awstralia.[2]
Ym mis Medi 1854 fe adawodd Claxton Sydney am Kolkata, lle bu'n gwerthu nifer o'i luniau. Dychwelodd i Loegr yn 1858 trwy'r Aifft.
Mae llun Claxton "Golygfa Gyffredinol o Harbwr a Dinas Sydney" yn y casgliad Brenhinol yn Lloegr, ac mae ganddo ddau lun yn y casgliad Dickinson yn Oriel Gelf New South Wales, Sydney. Mae ei bortreadau o'r Esgob William Broughton a Dean Cowper yng Ngholeg St. Paul, Prifysgol Sydney, ac mae ei bortread o'r Parch Robert Forrest yn cael ei arddangos yn Ysgol y Brenin, Parramatta. Mae ei beintiad o'r Arglwyddes Godiva yn Oriel Gelf Herbert ac mae hefyd wedi arddangos gwaith yn Oriel Gelf Derby ac Amgueddfa Victoria ac Albert.[3] Bu ei dirlun The Anglesey Coast yng nghasgliad yr artist â chysylltiadau a Chonwy, Buckley Ousey, ar un adeg.[4]
Roedd yn adnabyddus hefyd am ei luniau perthnasol i'r achos Wesleaidd, megis ei ddarlun testunol ar John Wesley at Oxford a The Holy Triumph of John Wesley in His Dying[5]. Daeth nifer o'r darluniau Wesleaidd yn boblogaidd ym mysg selogion yr enwad fel printiau.[6]
Marwolaeth golygu
Bu farw yn Llundain ar ôl salwch hir ar 28 Gorffennaf 1881.
Cyfeiriadau golygu
- ↑ Tomory, P. (2016, May 26). Claxton, Marshall (1813–1881), painter. Oxford Dictionary of National Biography adalwyd 20 Hydref 2018
- ↑ Australian Dictionary of Biography Claxton, Marshall (1813–1881) by David S. Macmillan adalwyd 20 Hydref 2018
- ↑ Artcyclopedia: Marshall Claxton adalwyd 20 Hydref 2018
- ↑ "THE LATE MR BUCKLEY OUSEY RCA OF CONWAY - The North Wales Chronicle and Advertiser for the Principality". Kenmuir Whitworth Douglas. 1890-03-22. Cyrchwyd 2018-10-20.
- ↑ Art UK The Holy Triumph of John Wesley in His Dying adalwyd 20 Hydref 2018
- ↑ "NODIADAU CYFUNDEDOL - Y Gwyliedydd". Amos Brothers. 1901-12-25. Cyrchwyd 2018-10-20.