Grŵp gwerin-pop Cymraeg yw Plu. Aelodau'r band yw Elan, Marged a Gwilym Rhys, sy'n frawd a dwy chwaer sy'n dod o ardal Caernarfon yng Ngogledd Cymru. Cafodd y grŵp ei ffurfio yn Haf 2012 ac maen nhw'n chwarae cerddoriaeth gwerin-bop amgen gyda harmoni agos 3 rhan yn asgwrn cefn cyson i’w set amrywiol.

Roedd Plu yn rhan o Horizons/Gorwelion, cynllun a redir gan BBC Cymru Wales mewn partneriaeth efo Cyngor Celfyddydau Cymru er mwyn datblygu cerddoriaeth gyfoes annibynnol, newydd yng Nghymru. Fel rhan o’r cynllun, cawsant gyfle i chwarae mewn gwyliau fel Gŵyl y Gelli a Gŵyl Rhif 6 a recordio sesiwn byw yn stiwdio BBC Maida Vale. Cafodd y tri gyfle i gynrychioli Cymru yn Folk Alliance International, Kansas City fis Chwefror 2016. Maent hefyd wedi cael cyfle i berfformio mewn rhai o wyliau cerddorol Prydain yn cynnwys Glastonbury a Gŵyl y Dyn Gwyrdd.

Albwm cyntaf y grŵp oedd Plu ar label Sbrigyn Ymborth, a gafodd ei ryddhau ym mis Gorffennaf 2013. Aled Hughes o Gowbois Rhos Botwnnog a gynhyrchodd yr albwm yma. Creodd Plu albwm o ganeuon i blant o’r enw Holl Anifeiliaid y Goedwig a gafodd ei ryddhau ym mis Rhagfyr 2014 ar label Sain. Cafodd eu trydydd albwm o’r enw Tir a Golau ei ryddhau ar label Sbrigyn Ymborth fis Tachwedd 2016 gan dderbyn adolygiadau da iawn. Enwebwyd y tri albwm ar gyfer Albwm Cymraeg y flwyddyn am dair blynedd yn olynol gyda’r diweddaraf ar restr fer y Wobr Gerddoriaeth Gymreig 2016. Fis Mawrth 2017 perfformiodd Pku yn Y Wladfa, Patagonia fel rhan o ŵyl Patagonia Celtica.

Mae Plu hefyd wedi cydweithio gyda Carwyn Ellis o’r band Colorama i greu prosiect 'Bendith'. Ym mis Mai 2016, cafodd sengl y prosiect Danybanc, gyda’r albwm Bendith yn cael ei ryddhau ym mis Hydref 2016. Cafodd EP Bendith ei ryddhau ar label Aficionado Records fis Chwefror 2017.

Dolenni allanolGolygu