The Gentleman's Magazine
Cylchgrawn misol Saesneg oedd The Gentleman's Magazine a gyhoeddwyd yn Llundain o 1731 i 1922. Ar ei anterth, yn ei gan mlynedd gyntaf, daeth i'r amlwg fel un o gyfnodolion llenyddol a gwleidyddol mwyaf dylanwadol.
 | |
| Enghraifft o'r canlynol | cylchgrawn, monthly magazine, men's magazine  |
|---|---|
| Daeth i ben | 1922 |
| Cyhoeddwr | Edward Cave |
| Iaith | Saesneg |
| Dyddiad cyhoeddi | Ionawr 1731 |
| Dechrau/Sefydlu | 1731 |
| Lleoliad cyhoeddi | Llundain |
| Statws hawlfraint | parth cyhoeddus, parth cyhoeddus |
| Sylfaenydd | Edward Cave |
| Pencadlys | Llundain |
 Ffeiliau perthnasol ar Gomin Wicimedia | |
Sefydlwyd y cylchgrawn gan Edward Cave dan y ffugenw Sylvanus Urban. Hwn oedd y defnydd cyntaf o'r gair magazine i ddisgrifio cyfnodolyn yn yr iaith Saesneg. Ei nod ar y cychwyn oedd i gasglu yn fisol y pigion o newyddion, ysgrifau, anecdotau, ac hysbysiadau a gyhoeddwyd yn yr amryw bapurau newydd a chyfnodolion dyddiol ac wythnosol. Erbyn 1739, cyfraniadau gwreiddiol oedd yn cyfri am y rhan fwyaf o'r cynnwys, yn hytrach na chrynoadau o'r newyddion ac ailargraffiadau. Cyhoeddwyd beirniadaeth lenyddol, ysgrifau, cofnod o gyhoeddiadau, ac adroddiadau o'r Senedd. Un o'r cyfranwyr rheolaidd oedd Samuel Johnson, cyfaill i Cave, a gafodd ddylanwad mawr ar y cylchgrawn.[1] Dyfeisiodd Johnson a Cave ffordd o osgoi'r gwaharddiad swyddogol ar ohebiaeth seneddol yn y wasg drwy esgus bod adroddiadau Johnson yn disgrifio'r trafodaethau gwleidyddol yn "Lilliput", gan arloesi traddodiad y sgetsh wleidyddol.
Sbardunwyd nifer o ddynwared-weithiau gan lwyddiant The Gentleman's Magazine, yn eu plith y London Magazine a'r Scots Magazine. John Nichols oedd y golygydd o 1792 i 1826, a chyhoeddwyd ysgrifau gan Charles Lamb ac enwogion eraill dan ei olygyddiaeth. Fodd bynnag, ymddangosodd y cylchgrawn yn hen ffasiwn i nifer o'r to iau o lenorion, ac mae sylwadau William Hazlitt ym 1823 yn nodi ffarwél i oes aur y cyfnodolyn.[1] Parhaodd fel cylchgrawn cyffredinol am ryw gan mlynedd arall.