Dyfrig Evans
Actor a cherddor o Gymro oedd Dyfrig Wyn Evans (23 Awst 1978 – 26 Mai 2022). Roedd yn adnabyddus am ei berfformiadau mewn cyfresi teledu megis Rownd a Rownd, Talcen Caled a Darren Drws Nesa. Yn y 1990au, fe oedd prif leisydd y band Topper ac roedd nifer yn ei adnabod fel 'Dyfrig Topper'.[1]
| Dyfrig Evans | |
|---|---|
| Ganwyd | 23 Awst 1978  Bangor |
| Bu farw | 26 Mai 2022 Caerdydd |
| Dinasyddiaeth |  Cymru |
| Galwedigaeth | actor teledu, cerddor, canwr |
Bywyd cynnar golygu
Roedd Dyfrig yn wreiddiol o Benygroes ac aeth i Ysgol Dyffryn Nantlle.[2]
Gyrfa golygu
Actio golygu
Cafodd Dyfrig ei ran gyntaf ar deledu yn 13 mlwydd oed, yn C'mon Midffîld!.[3] Daeth i’r amlwg wedyn fel un o gast gwreiddiol Rownd a Rownd, yn portreadu Arwel Jones neu 'Ari Stiffs' a bu'n actio ar y gyfres am bum mlynedd. Yn 2002 ymunodd â chast Talcen Caled fel Huw Williams. Bû'r cymeriad yn rhan o'r rhaglen tan ddiwedd y gyfres yn 2005.
Roedd hefyd yn rhan o'r gyfres Emyn Roc a Rôl yn chwarae’r cymeriad Eryl, aelod o'r band ac un o'r prif gymeriadau. Ymddangosodd mewn cyfresi teledu arall fel Tipyn o Stâd, Gwlad yr Astra Gwyn ac Y Gwyll.
Rhwng 2017 a 2018 bu'n portreadu Kevin mewn dwy gyfres o Darren Drws Nesa.
Cerddoriaeth golygu
Yn 1992 daeth yn aelod o fand y Paladr gyda'i frawd Iwan Evans. Yn 1995 rhyddhawyd eu cân gynta, sef "Dwi'm yn gwbod. Pam?", ar gasgliad aml-gyfrannog gan label Ankst o'r enw S4C Makes Me Want To Smoke Crack Vol 1. Ymddangoson nhw hefyd ar yr ail record yn y gyfres S4C Makes Me Want To Smoke Crack Vol 2 yn 1996, ond y tro yma dan enw newydd, Topper.
Cynhyrchwyd Arch Noa, EP cyntaf y band, a’r albwm Something to Tell Her gan Mark Roberts o Catatonia. Rhyddhawyd y ddau ar label Ankst yn 1997. Ar gychwyn 1999 rhyddhawyd albwm 'mini' arall, Non Compos Mentis, y tro yma ar eu label eu hunain, Bedlam.
Rhyddhaodd y grŵp eu trydydd albwm Dolur Gwddw yn 2000. Rhyddhawyd y casgliad Y Goreuon O'r Gwaethaf ar label Rasal yn 2005. Yn 2006 cyhoeddoedd Dyfrig albwm o'r enw Idiom fel cerddor unigol.
Yn 2019 daeth yn drydydd yng nghystadleuaeth Cân i Gymru gyda'r gân LOL.[4]
Bywyd personol golygu
Roedd Dyfrig yn byw yng Nghaerdydd gyda ei bartner Elaine Jenkins.[3] Roedd ganddo ddau o blant, Caio a Twm gyda’i gyn-wraig Rowena a merch o'r enw Begw gyda ei gyn-bartner Meleri.[5]
Bu'n reolwr ar Gegin Bodlon yng Nghaerdydd am dair mlynedd.[6]
Marwolaeth golygu
Bu farw ar ôl salwch byr yn 43 mlwydd oed.
Cynhaliwyd ei angladd brynhawn dydd Mawrth, 14 Mehefin 2022, ym Mhenygroes. Daeth rhai cannoedd i wasanaeth cyhoeddus er cof amdano yng Nghapel y Groes dan arweiniad y Parchedig Geraint Roberts.[7] Dangoswyd rhaglen deyrnged i Dyfrig ar S4C, 24 Mehefin 2022.[8]
Ffilmyddiaeth golygu
| Blwyddyn | Teitl | Rhan | Cwmni Cynhyrchu | Nodiadau |
|---|---|---|---|---|
| 1992 | Midffîld: Y Mwfi | Osborne Picton (ifanc) | Ffilmiau'r Nant | |
| 1995-2000 | Rownd a Rownd | Arwel Jones | Ffilmiau'r Nant | Cymeriad rheolaidd |
| Meibion Glandŵr | ||||
| 2002-2005 | Talcen Caled | Huw Williams | Ffilmiau'r Nant | Cyfres 3-5 |
| 2004-2005 | Emyn Roc a Rôl | Eryl | Elidir | 2 Gyfres |
| 2006 | Llythyrau Ellis Williams | Ellis Williams | ||
| 2008 | Tipyn o Stâd | Scott | Cwmni Da | Cyfres 7 |
| 2009 | Blodau | Cwmni Da | ||
| Gwlad yr Astra Gwyn | ||||
| 2014 | Jam Man | Mike | ffilm fer | |
| 2016 | Y Gwyll | Dafydd Morris | Fiction Factory | Cyfres 3 |
| 2017-2018 | Darren Drws Nesa | Kevin | Rondo | 2 Gyfres |
| 2018 | Gwen | Tad | ||
| 2019 | Cân i Gymru | Canwr / Cyfansoddwr | Avanti | 3ydd |
| 2019-2020 | Helo Syrjeri | Trosleisio | 2 gyfres | |
| 2019 | Craith | Glyn Jones | Severn Screen | Cyfres 2 |
| 2021 | Hewlfa Drysor | Ifas y Tryc[9] | Avanti | |
| 2021 | Fflam | Matti | Vox Pictures | |
| 2022 | Stâd | Scott | Cwmni Da | 1 cyfres; dilyniant o Tipyn o Stâd |
Disgyddiaeth golygu
- Gweler hefyd ddisgyddiaeth Topper
Albymau golygu
- Idiom (Rasal, 2007)
Senglau ac EP golygu
- Mae Gen i Angel (Jig Cal, 2020)[10]
Cyfeiriadau golygu
- ↑ Y cerddor a'r actor Dyfrig Evans wedi marw yn 43 oed , BBC Cymru Fyw, 26 Mai 2022.
- ↑ https://www.bbc.co.uk/radiocymru/c2/safle/gwesteion/cynnwys/dyfrigevans.shtml
- ↑ 3.0 3.1 Dyfrig Evans , Golwg360, 14 Ionawr 2021. Cyrchwyd ar 26 Mai 2022.
- ↑ https://www.s4c.cymru/cy/adloniant/cn-i-gymru-2019/page/31043/lol-dyfrig-evans/[dolen marw]
- ↑ https://www.thefreelibrary.com/How+Dyfrig+Evans+bounced+from+music+to+acting+and+back+again.-a0156006562
- ↑ [0=AZW06gFNZodUrHNxRZKx0whHtQCCDu0ZFvpZ7uHFJlDPnn0HzW7wK-gyzqAALifXxApAMdNZJCJb60rPX-BJqmC8ipzYetrsKJu3hflGNmRC4tIJYYjRc4hfE07bEIeoSQCJnyfyNmcd97WmHuRpxp8qvUf7ty3dB1p1Y5XOXyeR4t-rdqB9VDHprib2MbDgfyHMcks400m3p4jT88bzaq8Cf2dxFwtekOCsq_A1mQeP0Q&__tn__=%2CO%2CP-R Facebook - Bodlon]. Bodlon (26 Mai 2022).
- ↑ Cynnal angladd y cerddor a’r actor Dyfrig Evans ym Mhenygroes , Newyddion S4C, 14 Mehefin 2022.
- ↑ Dyfrig. S4C (24 Mehefin 2022).
- ↑ https://golwg.360.cymru/cylchgrawn/2030509-dyfrig-evans
- ↑ https://selar.cymru/2020/sengl-nadolig-newydd-dyfrig-evans/