Kyffin Williams

Arlunydd o Gymru oedd Syr John Kyffin Williams (9 Mai 1918 – 1 Medi 2006) a adwaenwyd fel Kyffin Williams.

Kyffin Williams
Ganwyd	9 Mai 1918  Llangefni
Bu farw	1 Medi 2006  Ynys Môn
Man preswyl	Llangefni
Dinasyddiaeth	y Deyrnas Unedig, Cymru, Teyrnas Unedig Prydain Fawr ac Iwerddon
Alma mater	Ysgol Gelfyddyd Gain Slade Ysgol Amwythig Ysgol Moreton Hall
Galwedigaeth	arlunydd
Arddull	celf tirlun
Tad	Henry Inglis Wynne Williams
Gwobr/au	KBE, OBE, Marchog Faglor

Bedd Kyffin Williams ym mynwent eglwys Llanfair-yng-Nghornwy, Môn

Bywgraffiad

Cafodd ei eni yn Llangefni, Ynys Môn. Methodd archwiliad meddygol i ymuno â'r Fyddin Brydeinig ym 1941 oherwydd ei gyflwr epilepsi, ac felly dywedodd ei feddyg wrtho i ymhél â chelf. Cyn ei farwolaeth roedd nifer yn ei ystyried yn beintiwr olew Cymreig mwyaf ei oes. Ei hoff themâu oedd tirwedd a phobl ei ardal enedigol, ond ym 1968 fe aeth i Batagonia i gofnodi'r Wladfa Gymreig yn ei gelf. Cafodd ei ethol yn aelod o Academi Frenhinol y Celfyddydau ym 1976 ac fe'i urddwyd yn Farchog Cadlywydd Urdd yr Ymerodraeth Brydeinig yn 2000. Yn ei flynyddoedd olaf trigai Kyffin Williams ym Mhwllfanogl, Ynys Môn, lle y bu iddo farw o gancr yn 2006. Claddwyd ef ym mynwent Llanfair-yng-Nghornwy.

Cymynrodd Kyffin Williams

Ar ôl ei farwolaeth, gadawodd Kyffin ran helaeth o'i gasgliad i'r Llyfrgell Genedlaethol Cymru yn Aberystwyth. Roedd hyn yn cynnwys amryw o weithiau celf ei hun ynghyd â gweithiau artistiaid yr oedd ef yn ei edmygu. Ynghyd â'i gasgliad, gadawodd dros £400,000 iddynt greu storfa penodol ynghyd â cyflogi staff i gatalogio a ddigido'r casgliad.

Yn 2008 cychwynnodd brosiect Cymynrodd Kyffin Williams. Mae'r casgliad yn cynnwys "1200 o weithiau ar bapur, 200 darlun olew a thros 300 o brintiau gwreiddiol yn darlunio tirlun a phobl Cymru; archif gynhwysfawr yn cynnwys gohebiaeth, dyddiaduron a llawysgrifau, ynghyd â grŵp mawr o ffotograffau a sleidiau".

Gweler hefyd

• Kyffin a'i Gynefin, llyfr gan Carolyn Davies, Lynne Bebb a Siân Owen; 2005.

Dolenni allanol

• Cofiant Kyffin Williams Archifwyd 2005-03-09 yn y Peiriant Wayback
• Kyffin Williams yn Oriel Martin Tinney Archifwyd 2006-02-11 yn y Peiriant Wayback
• Oriel Kyffin Williams - argraffiadau

Eginyn erthygl sydd uchod am Gymro neu Gymraes. Gallwch helpu Wicipedia drwy ychwanegu ato.