Pip Broughton

Cyfarwyddwr ffilm, teledu a theatr yw Philippa Jane Broughton, a adnabyddir fel Pip Broughton (ganed Ebrill 1957, Lerpwl).

Gyrfa

Bu Broughton yn gweithio fel cyfarwyddwr theatr am 15 mlynedd, gan gynnwys swyddi fel Cyfarwyddwr Creadigol Croydon Warehouse, Paines Plough a Nottingham Playhouse. Mae wedi gweithio ym maes ffilm a theledu ers 1995, gan gyfarwyddo sawl ffilm ar gyfer Channel 4 a chyfresi drama ar ran ITV a'r BBC, megis Blood on the Dole, The Bill, Close and True, a 55 Degrees North.

Ers 2013, mae Broughton wedi bod yn cynhyrchu, a gweithio gyda chyfarwyddwyr newydd fel rhan o gyfres Playhouse Presents Sky Arts; gan gyd-weithio gyda Idris Elba, Matt Smith a Polly Stenham; a'r llenorion Frank McGuinness, Eve Ensler, Mark Ravenhill, Jeremy Brock, Paul O’Grady, Rebecca Lenkiewicz a Sandi Toksvig.

Yn 2014, cyfarwyddodd Broughton addasiad o Under Milk Wood ar gyfer y BBC, ffilm a serennodd Michael Sheen, Tom Jones, a Jonathan Pryce..

Vox Pictures

Ar y cyd â'r cynhyrchydd Adrian Bate, mae Broughton yn rhedeg cwmni Vox Pictures. Mae eu cynhyrchiadau'n cynnwys Just Jim, a ysgrifennwyd a chyfarwyddwyd gan Craig Roberts; Aberfan: The Green Hollow, ffilm o gerdd gan Owen Sheers a gyfarwyddwyd gan Broughton, a enwebwyd ar gyfer gwobr BAFTA yn y categori Drama Unigol Orau ar gyfer Teledu; Un Bore Mercher (a'r fersiwn Saesneg Keeping Faith), a gyfarwyddwyd gan Broughton, ysgrifennwyd gan Matthew Hall a serennodd Eve Myles, ar gyfer S4C a BBC Cymru.

Bywyd personol

Mae Broughton yn byw yn Nhrefynwy gyda'i gŵr Aneirin Hughes a dau o blant.

Dolenni allanol

Pip Broughton

Eginyn erthygl sydd uchod am Gymro neu Gymraes. Gallwch helpu Wicipedia drwy ychwanegu ato.