Shane Williams

Chwaraewr Rygbi'r Undeb i dîm y Gweilch a chyn-chwaraewr rhyngwladol dros Gymru yw Shane Mark Williams (ganed 26 Chwefror 1977). Mae'n chwarae fel asgellwr fel rheol, ond gall chwarae fel mewnwr neu fel maswr.

Shane Williams
Ganwyd	26 Chwefror 1977  Abertawe
Dinasyddiaeth	y Deyrnas Unedig
Alma mater	Ysgol Dyffryn Aman
Galwedigaeth	chwaraewr rygbi'r undeb, pêl-droediwr
Taldra	170 centimetr
Pwysau	77 cilogram
Gwobr/au	MBE, World Rugby Men's Player of the Year
Chwaraeon
Tîm/au	Y Barbariaid, Tîm rygbi'r undeb cenedlaethol Cymru, Y Gweilch, Clwb Rygbi Castell-nedd, Ricoh Black Rams Tokyo, Y Llewod Prydeinig a Gwyddelig
Safle	Asgellwr
Gwlad chwaraeon	Cymru

Ganed ef yn Abertawe, a bu'n chwarae rygbi i dîm Castell Nedd cyn ymuno a'r Gweilch. Enillodd ei gap cyntaf dros Gymru mewn gêm yn erbyn yr Eidal yn 2000, pan sgoriodd gais.

Yn ystod Pencampwriaeth y Chwe Gwlad yn 2005, roedd yn rhan o'r tîm Cymreig a gyflawnodd y Gamp Lawn, gan sgorio cais yr un yn erbyn yr Eidal, yr Alban a Lloegr. Dewiswyd ef i fynd i Seland Newydd gyda'r Llewod yr un flwyddyn. Sgoriodd bum cais mewn gêm yn erbyn Manawatu.

Yn ystod Pencampwriaeth y Chwe Gwlad 2008, sgoriodd ddau gais yr un yn erbyn yr Alban a'r Eidal a chais yn erbyn Iwerddon; y cais yn erbyn Iwerddon oedd y 40fed iddo ei sgorio i Gymru, yn ei roi yn gydradd a Gareth Thomas fel y sgoriwr uchaf i Gymru. Yng ngêm olaf y bencampwriaeth, yn erbyn Ffrainc, sgoriodd gais arall i dorri'r record. Ar ddiwedd y gystadleuaeth, enwyd ef yn chwaraewr y bencampwriaeth.

Enillodd yr anrhydedd o fod yn Personoliaeth Chwaraeon Cymreig y Flwyddyn BBC Cymru yn 2008. Daeth ei gais yn erbyn yr Alban yn gêm gyntaf Pencampwriaeth y Chwe Gwlad 2009 a'i gyfanswm i 45 cais.

Cyhoeddodd Shane y byddai'n ymddeol ar ddiwedd cystadleuaeth Cwpan y Byd 2011. Sgoriodd dri cais yn y gystadleuaeth gan symyd y cyfanswm o nifer o geisiau a sgoriodd dros Gymru i 57. Dywedodd ei gyd-chwaraewr Jamie Roberts ei fod yn tybio mai Shane Williams oedd chwaraewr mwyaf cyffrous ei genhedlaeth.

Mae Shane yn siarad Cymraeg yn rhugl ac mae wedi ymddangos mewn sawl rhaglen ar S4C, gan gynnwys Clwb Rygbi Shane.

Chwaraeodd ei gem olaf dros ei wlad yn erbyn Awstralia yn Stadiwm y Mileniwm ar 3 Rhagfyr 2011. Sgoriodd ei 58fed cais dros Gymru yn eiliadau olaf y gem.

Ymunodd Shane Williams â thîm cyflwyno Y Clwb Rygbi Rhyngwladol ar S4C ar gyfer Pencampwriaeth y Chwe Gwlad yn 2012.

Record Pwyntiau

 Clwb

Tîm	Tymor	Gemau	Ceisiau	Trosiadau	Gôl Gosb	Gôl Adlam	Cyfanswm Pwyntiau
Castell Nedd	1997-98	11	1	0	0	0	5
	1998-99	26	15	1	0	0	77
	1999-00	28	17	0	0	0	85
	2000-01	30	15	39	59	0	332
	2001-02	3	3	0	0	0	15
	2002-03	31	20	0	0	0	100
	Cyfanswm	129	71	40	59	0	612
Gweilch	2003-04	13	5	0	0	0	25
	2004-05	21	10	0	0	0	50
	2005-06	13	3	0	0	0	15
	2006-07	21	14	0	1	0	73
	2007-08	16	6	0	0	0	30
	2008-09	18	9	0	1	0	49
	2009-10	17	3	0	0	0	15
	2010-11	8	3	0	0	0	15
	2011-12	14	3	1	0	0	17
	Cyfanswm	141	57	1	0	2	293
Mitsubishi Dynaboars	2012-15	10	6	0	0	0	30
Cyfanswm		368	123	1	0	2	974

Rhyngwladol

Tîm	Gemau	Ceisiau	Cyfanswm Pwyntiau
Cymru	87	58	290
Gemau Llewod Prydain ac Iwerddon	7	6	30
Gemau Prawf Llewod Prydain ac Iwerddon	4	2	10
Cyfanswm	98	66	330

Cyfeiriadau

Rhagflaenydd: Joe Calzaghe

Personoliaeth Chwaraeon Cymreig y Flwyddyn BBC Cymru 2008

Olynydd: Ryan Giggs