OLION (cynhyrchiad theatr)

Cynhyrchiad theatr dair-rhan a phrosiect gymunedol yn ardal Hirael, Bangor ydi OLION, o waith cwmni theatr Frân Wen, a lwyfannwyd yn 2024. "Trioleg o grombil y Mabinogi", yw disgrifiad y cwmni o'r cynhyrchiad ar eu gwefan, "dyma ail-ddychmygiad cyfoes o chwedl Arianrhod". Yn Rhan Un: Arianrhod cafwyd hanes boddi Caer Arianrhod, ac a lwyfannwyd yn Pontio Bangor ym mis Medi. Digwyddiad un diwrnod ar yr 28 Medi 2024 oedd Rhan Dau: Yr Isfyd, a ffilm fydd Rhan Tri: Y Fam, yn Hydref 2024. "Archwilio’r dewrder o fod yn ‘wahanol’ mewn byd anfaddeuol", yw diben y cynhyrchiad, yn ôl cyfarwyddwr artistig Frân Wen, Gethin Evans.

OLION

Enghraifft o'r canlynol	cynhyrchiad theatr a ffilm
Crëwr	Theatr Frân Wen
Dyddiad cynharaf	2023 - 2024
Awdur	Angharad Elen a Sera Moore Williams
Iaith	Cymraeg
Cysylltir gyda	Pedair Cainc y Mabinogi a Frân Wen

Cefndir

"Mae Olion, sy'n rhaglen 15 mis o weithgareddau hefyd yn cael ei gefnogi gan Gyngor Gwynedd", noda gwefan y cwmni; "Mae’r prosiect wedi derbyn £252,911 gan Lywodraeth y DU drwy Gronfa Ffyniant Gyffredin y DU", ychwanegodd. Bu'r cwmni hefyd yn cyd-weithio gyda'r elusen GISDA a Storiel ym Mangor.

"Dechreuodd ein partneriaeth gyda GISDA a phrosiect Nabod ddwy flynedd yn ôl", eglura Gethin Evans; "Fe wnaeth y bobl ifanc sy’n rhan o’r prosiect lunio stori, naratif a chymeriadau dros 18 mis oedd yn dilyn thema eithaf penodol. Ar yr un pryd, roeddwn yn cael sgyrsiau gydag artistiaid amrywiol am bethau roedden nhw’n dyheu amdanyn nhw o ran prosesau creadigol - graddfa, uchelgais, cyd-greu, a chyfleoedd i weithio mewn ffyrdd newydd. Ac felly dyna ddechreuad OLION, gyda'r weledigaeth o gynnig rhywbeth gwahanol i artistiaid a chynulleidfaoedd".

"Daeth y gair ‘Olion’ i’r amlwg pan dreuliais i [Gethin Evans] ddau ddiwrnod gyda Marc [Rees] fis Ionawr diwethaf. Mi wnaethon ni drafod y syniad o gymunedau coll, yr olion maen nhw'n eu gadael ar ôl a'r effaith ar gymuned cenedlaethau'n ddiweddarach. Roedden ni’n teimlo bod hyn yn berthnasol i sawl elfen o'r prosiect. Daeth OLION yn deitl gwych achos roedd o’n croesi dau fyd, y da, y drwg, y golau, y tywyllwch"

Bu'r dramodydd Sera Moore Williams yn cyd-weithio efo'r bobol ifanc am gyfnod o 5 wythnos, ynghyd â'r llenor Angharad Elen.

Rhan Un: Arianrhod

Llwyfannwyd y rhan gyntaf yn Pontio Bangor yn ystod mis Medi 2024. Cyd-gyfarwyddwyr Gethin Evans ac Anthony Matsena yn enedigol o Simbabwe, ond bellach yn byw yn Abertawe; ysgrifenwyr: Angharad Elen a Sera Moore Williams; dramatwrg arweiniol: Angharad Elen; dylunydd set a gwisgoedd: Elin Steele; cyfansoddwr: Alex Comana; cynllunydd sain: Sam Jones; dylunydd goleuo: Ryan Joseph Stafford; cast:

• Arianrhod - Rhian Blythe
• Gwydion - Owain Gwynn
• Elan - Chenai Chikanza
• Goewin a Heulwen - Mirain Fflur
• Madoc - Owen Alun
• Dôn - Sharon Morgan
• Seren - Aisha-May Hunte
• Gilthfaethwy - Rhodri Trefor
• Dawnswyr - Mischa Jardine, Amber Howells, Julia Costa, Keith Alexander a Harrison Claxton
• Y Plant - Grace Evans, Maria Mbabaali, Pedro Sochukwykaima Enyi, Milly Ann Griffiths ac Owain Rhys Jones.

Rhan Dau: Yr Isfyd

Llwyfannwyd yr ail ran ar ddydd Sadwrn, 28 Medi 2024 yn ardal Hirael a'r Pier yn Bangor. Cyd-gyfarwyddwr Marc Rees a Gethin Evans; coreograffydd - Anthony Matsena; ysgrifenwyr: Angharad Elen a Sera Moore Williams; dramatwrg arweiniol: Angharad Elen; dylunydd set a gwisgoedd: Elin Steele; cyfansoddwr: Alex Comana; cynllunydd sain: Sam Jones; dylunydd goleuo: Ryan Joseph Stafford; cast:

• Gwyneth - Rhian Blythe
• Trefor - Owain Gwynn
• Elan - Chenai Chikanza
• Heulwen - Mirain Fflur
• Madoc - Owen Alun
• Seren - Aisha-May Hunte
• a chast lleol o bob oed.

Rhan Tri: Y Fam

Ffilm fydd Rhan Tri yn Hydref 2024.

"Yr epilog. Ffilm fer sy’n cyfuno deunydd o ran I a II wrth i ni ddilyn stori teulu cyffredin o Fangor. Ond beth sy’n digwydd pan fydd siwrne seicedelig yn trawsnewid Hirael i mewn i fyd ffantasi Caer Arianrhod?"