Llynnoedd Mawr Affrica

Rhwydwaith o lynnoedd ar hyd ddeheubarth Hollt Dwyrain Affrica yw Llynnoedd Mawr Affrica (Swahili: Maziwa Makuu). Yr wyth llyn mwyaf yn nhermau arwynebedd yw Victoria (68,870 km²), Tanganica (32,600 km²), Malawi neu Nyasa (29,500 km²), Turkana neu Rudolf (6,405 km²), Albert (5,299 lm²), Kivu (2,700 km²), Rukwa (5,760 km²), ac Edward (2,325 km²).

Llynnoedd Mawr Affrica

Map o Lynnoedd Mawr Affrica.
Math	grŵp o lynnoedd
Daearyddiaeth
Gwlad	Bwrwndi, Sambia, Cenia, Gweriniaeth Ddemocrataidd y Congo, Malawi, Mosambic, Rwanda, Tansanïa, Wganda, Ethiopia
Cyfesurynnau	8°S 35°E
Ffeiliau perthnasol ar Comin

Yn neheubarth y Dyffryn Hollt Mawr mae Llyn Malawi, a ddraenir gan Afon Zambezi. Ar hyd Orllewin yr Hollt saif Llynnoedd Tanganica a Kivu o fewn dalgylch Afon y Congo, a Llynnoedd Edward ac Albert sydd yn llifo i Afon Nîl. Mae llynnoedd Dwyrain yr Hollt, ac eithrio Llyn Turkana, yn llai o faint na llynnoedd y gorllewin ac maent yn ffurfio sawl dalgylch afon mewnwladol ar wahân. Lleolir Llyn Victoria, llyn dŵr croyw ail fwyaf y byd yn nhermau arwynebedd, ar grychiad bas i lawr rhwng ucheldiroedd Gorllewin yr Hollt a'r Dwyrain.

Mae pob un o'r wyth llyn mwyaf yn croesi ffiniau rhyngwladol, ac eithrio Llyn Rukwa a leolir yn gyfan gwbl y tu mewn i ffiniau Tansanïa. Rhennir Llyn Turkana rhwng Cenia ac Ethiopia; Llyn Victoria rhwng Wganda, Tansanïa, a Chenia; Llynnoedd Albert ac Edward rhwng Wganda a Gweriniaeth Ddemocrataidd y Congo; Llyn Kivu rhwng Rwanda a Gweriniaeth Ddemocrataidd y Congo; Llyn Tanganica rhwng Tansanïa, Gweriniaeth Ddemocrataidd y Congo, Bwrwndi, a Sambia; a Llyn Malawi rhwng Malawi, Mosambic, a Thansanïa.

Gweler hefyd

• Argyfwng ffoaduriaid y Llynnoedd Mawr