Ysgol y Creuddyn

Ysgol uwchradd Gymraeg yn sir Conwy yw Ysgol Y Creuddyn. Fe'i lleolir ar safle pwrpasol ar gyrion Bae Penrhyn, rhwng Llandudno a Bae Colwyn. Fe'i henwir ar ôl Y Creuddyn, enw hanesyddol yr ardal a chwmwd yn yr hen gantref Rhos.

Ysgol y Creuddyn
Arwyddair	Dawn, Dysg, Daioni
Sefydlwyd	1981
Math	Cyfun, y Wladwriaeth
Cyfrwng iaith	Cymraeg
Pennaeth	Mr. Trefor T. Jones
Lleoliad	Ffordd Derwen, Bae Penrhyn, Llandudno, Conwy, Cymru, LL30 3LB
AALl	Cyngor Sir Conwy
Staff	tua 60
Disgyblion	658
Rhyw	Cyd-addysgol
Oedrannau	11–18
Llysoedd	Bodysgallen, Gloddaeth, Penrhyn
Lliwiau	Gwyrdd tywyll a melyn
Cyhoeddiadau	"Mwy nag Addysg" - Ysgol y Creuddyn 1981-2006
Gwefan	[3]

Roedd 658 o ddisgyblion yn Ysgol y Creuddyn yn 2015. Daw 77% o’r disgyblion o gartrefi lle nad yw’r Gymraeg yn brif iaith.

Daw disgyblion yr ysgol o ddalgylch eang sy'n ymestyn cyn belled a Llanfairfechan ac Eglwysbach yn y gorllewin ac Abergele a Llansannan yn y dwyrain.

Hanes

Daeth sefydlu Ysgol y Creuddyn wedi blynyddoedd o frwydro caled gan rieni, Cymdeithas yr Iaith ac eglwysi Cymraeg y dalgylch a Chymdeithas y Cymrodorion. Yn 1963 trefnwodd cell Bangor o'r Gymdeithas ddeiseb ac ymgyrch i gael dwy ysgol Gymraeg: y naill ym Mangor a'r llall yn ardal Llandudno. Gwrthwynebodd Pwyllgor Addysg Sir Gaernarfon y cynllun ar y sail nad oedd digon o ddisgyblion i gyfiawnhau ysgol ddwyieithog newydd yng nghyffiniau Llandudno. Parhaodd yr un agwedd yn nyddiau cynnar y Sir Gwynedd newydd wedi'r ad-drefnu ym 1974, ond parhaodd y rhieni i bwyso'n ddi-baid ar y Pwyllgor Addysg. Daeth datblygiad yn ffurf llythyr Cyfarwyddwr Addysg Clwyd at Gyfarwyddwr Addysg Gwynedd, yn gofyn am ystyriaeth i godi ysgol ddwyieithog newydd ar y cyd, ar neu yn ymyl ffin y ddwy sir. Cytunodd Pwyllgor Addysg Gwynedd i'r gwahoddiad, a bu cydweithio rhyngddynt. Penderfynwyd fod Gwynedd i weinyddu'r ysgol a bod cost ei chynnal i'w dalu yn ôl nifer y plant o'r ddwy sir. Nid siroedd Caernarfon a Gwynedd yn unig a wrthwynebodd y gofynion am ysgol ddwyieithog newydd. Roedd rhai unigolion lleol hefyd yn dymuno gohirio neu ddiddymu agor yr ysgol ar y sail nad oedd digon o ddisgyblion a theuluoedd Cymraeg yn y cyffiniau, a gwell byddai ychwanegu at ysgolion uwchradd lleol megis Ysgol John Bright yn Llandudno ac Ysgol Aberconwy yng Nghonwy.

Agorodd yr ysgol ddydd Mercher 2 Medi 1981 i 218 o ddisgyblion tra fo'r adeiladu'n parhau. Agorwyd yr ysgol yn swyddogol Hydref 17, 1984 gan y cynghorydd O. M. Roberts; un o'r amlycaf o'r ymgyrchwyr a sicrhaodd fodolaeth yr ysgol a hefyd Cadeirydd cyntaf y Corff Llywodraethol.

Logo

Daw dyluniad a siap logo'r ysgol o amlinelliad to neuadd ddrama'r ysgol.

Dathliadau Chwarter Canrif Ysgol Y Creuddyn 2006

• 
  Mwy Nag Addysg - llyfr gyhoeddwyd ar gyfer dathlu 25 mlynedd Ysgol Y Creuddyn.
• 
  Mr Geraint Williams,Y Cyfarwyddwr Addysg, Dr Meirion Davies a Mr Arfon Williams gyda'r bws mini newydd a brynwyd yn ystod y dathlu.
• 
  Dr Meirion Davies, Y Pennaeth, gyda Mr Arfon Williams, Cadeirydd Bwrdd y Llywodraethwyr.
• 
  Seremoni o gyflwyno copi o'r llyfr i Mr Roland Jones a blodau i Mrs Jill Jones. O'r chwith: Dr Meirion Davies, Mrs Jill Jones, Mr Roland Jones, Mr Arfon Williams a Mr Emyr Williams

Dolenni allanol

• Gwefan yr ysgol

Cyfeiriadau

Eginyn erthygl sydd uchod am ysgol yng Nghymru. Gallwch helpu Wicipedia drwy ychwanegu ato.

Eginyn erthygl sydd uchod am fwrdeistref sirol Conwy. Gallwch helpu Wicipedia drwy ychwanegu ato.