C.P.D. Tref Aberystwyth

Clwb pêl-droed o dref Aberystwyth, Ceredigion yw Clwb Pêl-droed Tref Aberystwyth (Saesneg: Aberystwyth Town Football Club). Mae'r clwb yn chwarae yn Uwch Gynghrair Cymru, prif adran pêl-droed yng Nghymru.

Tref Aberystwyth

Enw llawn	C.P.D. Tref Aberystwyth
Llysenwau	Aber Black and Greens The Seasiders
Sefydlwyd	1884 (1884)
Maes	Coedlen y Parc Aberystwyth (sy'n dal: 5,000 (1,002 yn eistedd))
Cadeirydd	Donald Kane
Rheolwr	Tony Pennock
Cynghrair	Uwch Gynghrair Cymru
2023/24	10.
Gwefan	Hafan y clwb
Lliwiau Cartref Lliwiau Oddi cartref

Tref Aberystwyth - Dan 19

Rheolwr	Emyr Jones
Cynghrair	WPL Development League - De
2016–17	7fed

Tref Aberystwyth - Merched

Rheolwr	Kevin Jenkins
Cynghrair	Uwch Gynghrair Merched
2016–17	9fed

Sêr Aberystwyth - Dan Anfantais

Sefydlwyd	2013
Hyfforddwr	Mike Price, Paul-Luke Loveridge, Iestyn Jones, Eirian Reynolds,
Cynghrair	Uwch Gynghrair Gorllewin Cymru (Dan Anfantais)

Aberystwyth v Derwyddon Cefn ar Goedlan y Parc (2023)

Coedlen y Parc, Maes Aberystwyth

Ffurfiwyd y clwb ym 1884 ac maent wedi codi Cwpan Cymru unwaith, ym 1900, yn ogystal â chynrychioli Cymru yng nghystadlaethau Ewropeaidd UEFA ar dair achlysur. Maent wedi bod yn aelodau o Uwch Gynghrair Cymru ers ei sefydlu ym 1992.

Mae'r clwb yn chwarae eu gemau cartref ar Goedlen y Parc, Aberystwyth, maes sy'n dal uchafswm o 5,000 o dorf gyda 1,002 o seddi. Mae gan y Clwb hefyd dîm Merched, tîm anabl a gwahanol dimau ieuenctid.

Hanes Cynnar

Aberystwyth yn erbyn C.P.D. Derwyddon Cefn yn 2023

Ffurfiwyd y clwb ym mis Hydref 1884 wedi i Arthur Hughes, mab i gyfreithiwr lleol, osod hysbyseb yn y papur newydd lleol yn gofyn am i chwaraewyr oedd eisiau ymuno â'r clwb newydd i gyfarfod yng Ngwesty'r Belle Vue, Aberystwyth ar brynhawn Sadwrn 4 Hydref.. Roedd Arthur a'i frodyr Jack a Hugh yn bêl-droedwyr o fri, ac roedd Jack eisoes wedi cynrychioli Cymru ddwywaith ym 1877 a 1879 tra'n fyfyriwr ym Mhrifysgol Caergrawnt.

Dechreuodd Aber chwarae yn y Welsh League ym 1896 ond dim ond am dymor, ond chwaraeodd y clwb yn rowndiau rhagbrofol Cwpan FA Lloegr a Chwpan Cymru cyn ymuno â'r Combination League ym 1899-1900 a cafwyd llwyddiant mwyaf y clwb yn ystod yr un tymor wrth iddynt godi Cwpan Cymru am yr unig dro yn eu hanes wedi buddugoliaeth 3-0 dros y C.P.D. Derwyddon Cefn yn Y Drenewydd.

Ar ôl gadael y Combination League, ymunodd Aber â Chynghrair Sir Drefaldwyn a'r Cylch ym 1904 gan ennill sawl pencampwriaeth cyn ymuno â'r Gynghrair Genedlaethol Gymreig (Adran y Canolbarth) ym 1921.

Llwyddodd Aber i ennill Cwpan Amatur Cymru ym 1931 a 1933.

Yn ystod tymor 2021/22 daeth Aberystwyth y clwb cyntaf yn hanes i chwarae 1,000 o gemau yn Uwch Gynghrair Cymru.

Record yn Ewrop

Tymor	Cystadleuaeth	Rownd	Clwb	Cymal 1af	2il Gymal	Dros Ddau Gymal
1999	Tlws Intertoto UEFA	1	Floriana	2-2	1-2	3–4
2004	Tlws Intertoto UEFA	1	Dinaburg	0–0	0–4	0–4
2014–15	Cynghrair Europa UEFA	Rhag 1	Derry City	0–4	0–5	0–9

Anrhydeddau

• Cwpan Cymru
  • Enillwyr: 1899-1900
  • Cyrraedd Rownd Derfynol: 2008-09, 2013-14
• Cwpan Amatur Cymru
  • Enillwyr: 1930-31, 1932-33, 1969-70
  • Cyrraedd Rownd Derfynol: 1906-07, 1910-11, 1928-29, 1934-35, 1971-72

Recordiau'r clwb

• Buddugoliaeth Fwyaf: 21-1 v. C.P.D. Machynlleth ym 1934.
• Colled Fwyaf: 1-20 v. C.P.D. Caersws yn 1962.
• Buddugoliaeth Fwyaf (Uwch Gynghrair Cymru): 6-0 v. Briton Ferry Athletic a Llanidloes 1993.
• Colled Fwyaf (Uwch Gynghrair Cymru): 1-8 v. Y Barri yn 1997.

Chwaraewyr nodedig

• Rhys Griffiths - Aelod o Oriel Anfarwolion Uwch Gynghrair Cymru
• Robert Herbert Mills-Roberts - 8 cap dros Gymru 1885–1892
• Tomi Morgan - Aelod o Oriel Anfarwolion Uwch Gynghrair Cymru
• Colin Reynolds - Aelod o Oriel Anfarwolion Uwch Gynghrair Cymru
• Leigh Richmond Roose - 24 cap dros Gymru 1900-1911
• Wyn Thomas - Aelod o Oriel Anfarwolion Uwch Gynghrair Cymru
• David Williams - Prif sgoriwr yn holl hanes y clwb
• Marc Lloyd Williams - Aelod o Oriel Anfarwolion Uwch Gynghrair Cymru

Tîm merched

Mae'r clwb hefyd yn cynnal C.P.D. Merched Tref Aberystwyth sy'n chwarae ar Goedlan y Parc ac sydd yn Uwch Gynghrair Merched Cymru. Bu'r tîm yn gyfrifol am chwarae y gêm gyntaf erioed yn yr hyn a ddaeth yn Uwch Gynghrair yn 2009.